ឯកឧត្តម ឡាយ វណ្ណៈ សមាជិកគណៈកម្មាធិការកណ្តាល គណបក្សប្រជាជនកម្ពុជា ប្រធានគណៈកម្មាធិការគណបក្សខេត្តតាកែវ និងជាអនុប្រធានក្រុមការងាថ្នាក់កណ្តាលចុះជួយស្រុកអង្គរបូរី បានជម្រុញឱ្យនាំគ្នាលុបបំបាត់ពាក្យ “ស្ត្រីបង្វិលចង្ក្រានមិនជុំ” ក្នុងឱកាសដែលអញ្ជើញជាអធិបតីក្នុងពិធីសំណេះសំណាល ជាមួយនារីឃុំមកពីគណបក្សប្រជាជនកម្ពុជា ក្នុងឃុំអង្គរបូរី និងអបអរសាទខួបលើកទី ១០៦ ទិវាសិទ្ធនារីអន្តរជាតិ ក្រោមប្រធានបទ ” ស្ត្រីដើម្បីសុខសន្តិភាព និងវឌ្ឍនភាព” នៅការិយាល័យគណបក្សស្រុកអង្គរបូរី នាព្រឹកថ្ងៃ០៥ ខែមីនា ឆ្នាំ២០១៧។
ក្នុងឱកាសនោះឯកឧត្តមបានសង្កត់ធ្ងន់ថា រាជរដ្ឋាភិបាលបាននឹង កំពុងយកចិត្តទុកដាក់យ៉ាងខ្លាំងក្នុងលើកកម្ពស់ សមភាព និងសមធម៌ យេនឌ័រ និងបានផ្តល់ឱកាសដល់ស្ត្រីបានចូលរួមនៅក្នុងរចនាសម្ព័ន្ធ ដឹកនាំរបស់ស្ថានប័ននានាតាំងពីថ្នាក់ជាតិរហូតដល់ថ្នាក់មូលដ្ឋាន។ ឯកឧត្តមបន្តថាបច្ចុប្បន្ននេះស្ត្រីបានរួមចំណែកយ៉ាងសំខាន់ក្នុងការ រក្សាសុខសន្តិភាព ស្ថេរភាព សណ្តាប់ធ្នាប់ និងការអភិវឌ្ឍន៍ប្រទេស ជាតិ ដូច្នេះយើងត្រូវតែលុបបំបាត់ចោលនូវពាក្យ “ស្ត្រីបង្វិលចង្ក្រាន មិនជុំនេះ”។
បន្ថែមពីនោះឯកឧត្តមក៏បានផ្តាំផ្ញើរដល់អាជ្ញាធរ និងសមត្ថកិច្ចពាក់ព័ន្ធ ទាំងអស់ត្រូវយកចិត្តទុកដាក់ចំពោះអំពើហឹង្សាលើស្ត្រី ធ្វើយ៉ាងណា កុំឱ្យកើតមានឱ្យសោះ ហើយប្រសិនបើកើតមានត្រូវចាត់វិធាន ការអន្តរាគមន៍ជាបន្ទាន់។
ជាកិច្ចឆ្លើយតបទៅនឹងការយកចិត្តទុកដាក់ចំពោះស្ត្រីពីសំណាក់ថ្នាក់ ដឹកនាំ បងប្អូនសមាជិកនារីគណបក្សប្រជាជនកម្ពុជាក្នុងឃុំអង្គរបូរី ទាំងអស់បានប្តេជ្ញាចិត្តធ្វើយ៉ាងណាជួយដល់គណបក្សដើម្បីយកឈ្នះការបោះឆ្នោតនាពេលខាងមុខឱ្យទាល់តែបាន។
