សម្តេចអគ្គមហាពញាចក្រី ហេង សំរិន បានទទួលជួបសវនាការ ជាមួយ ឯកឧត្តម វ៉ាង វិនធៀន ឯកអគ្គរដ្ឋទូតនៃសាធារណរដ្ឋប្រជាមានិតចិន ដែលទើបតែងតាំងថ្មី

សម្តេចប្រធានរដ្ឋសភា បានគូសបញ្ជាក់ថាចាប់ពីឆ្នាំ២០១០មក ទំនាក់ទំនងប្រទេសទាំងពីរបានឈានដល់កម្រិតជាប្រវត្តិសាស្រ្តមួយគឺ “ កិច្ចសហប្រតិបត្តិការភាពជាដៃគូយុទ្ធសាស្រ្តគ្រប់ជ្រុងជ្រោយ ” ដែលបាននិងកំពុងផ្តល់ផ្លែផ្កាជាក់ស្តែងលើគ្រប់វិស័យ ដល់សង្គមជាតិទាំងពីរ។

ឯកឧត្តម វ៉ាង វិនធៀន បានលើកឡើងថាទំនាក់ទំនងកម្ពុជា ជាទំនាក់ទំនង បងប្អូន មិត្តភ័ក្តិ យ៉ាងជិតស្និទ្ធ គោរព យោគយល់ និងបានគំាទ្រគ្នាទៅវិញទៅមក។ ប្រទេសចិនបានគាំទ្រដល់ការសម្រេចចិត្តរបស់ កម្ពុជាតាមមាគ៌ារបស់ខ្លួន ដើម្បីបូរណភាពទឹកដី និងឯករាជ្យភាព។

ឯកឧត្តម ឯកអគ្គរដ្ឋទូតបានអះអាងថា ធ្លាប់បានមកទស្សនកិច្ចនៅកម្ពុជាក្នុងកំឡុងឆ្នាំ២០០០ ហើយបានសង្កេតឃើញថា រយៈ១៨ឆ្នាំកន្លងមកនេះ កម្ពុជាមានការអភិវឌ្ឍគូរឲ្យកត់សម្គាល់ ក្រោមម្លប់ព្រះមហាក្សត្រ និងថ្នាក់ដឹកនាំរាជរដ្ឋាភិបាល ព្រមទាំងសភា ដែលធ្វើឲ្យកម្ពុជា មានសុខសន្តិភាព។

ឯកឧត្តម ក៏បានបញ្ជាក់បន្ថែមថាលទ្ធផលនៃការបោះឆ្នោត ជ្រើសតាំងសមាជិករដ្ឋសភានីតិកាលទី៦ គឺជាការសម្រេចចិត្តដ៏ត្រឹមត្រូវរបស់ពលរដ្ឋ ហើយប្រទេសចិនបន្តគំាទ្រដល់ការអភិវឌ្ឍនៅកម្ពុជា តទៅទៀតតាមលទ្ធភាពជាក់ស្តែង៕