នៅព្រឹកថ្ងៃទី២៨ ខែធ្នូ ឆ្នាំ២០១៨ ឯកឧត្តម ទិន ពន្លក អគ្គលេខាធិការ នៃអគ្គលេខាធិការដ្ឋានក្រុមប្រឹក្សាជាតិអភិវឌ្ឍន៍ដោយចីរភាព (ក.ជ.អ.ច.) បានអញ្ជើញជាអធិបតីក្នុងកិច្ចប្រជុំចុងក្រោយ នៃគណៈកម្មការគ្រប់គ្រងគម្រោង «បង្កើត ទទួលបាន និងប្រើប្រាស់ព័ត៌មាន និងចំណេះដឹងពាក់ព័ន្ធនឹងអនុសញ្ញារីយ៉ូទាំងបី» នៅសណ្ឋាគារសាន់វ៉េ រាជធានីភ្នំពេញ។
កិច្ចប្រជុំនេះរៀបចំឡើងក្នុងគោលបំណងដើម្បី៖ ១) បង្ហាញពីសមិទ្ធផលគម្រោងសំខាន់ៗជូនគណៈកម្មការគ្រប់គ្រងគម្រោង និង២) ការប្រកាសបិទគម្រោងជាផ្លូវការ។
គម្រោងអនុសញ្ញារីយ៉ូទាំងបី បានចាប់ដំណើរការក្នុងឆ្នាំ២០១៥ និងបញ្ចប់នៅខែធ្នូ ឆ្នាំ២០១៨នេះ។ គម្រោងបានអនុវត្តឡើងក្នុងគោលបំណងដើម្បីជំរុញការបង្កើត ទទួលបាន និងប្រើប្រាស់ព័ត៌មានទាក់ទងនឹងអនុសញ្ញារីយ៉ូទាំងបី រួមមានអនុសញ្ញាសហប្រជាតិស្តីពីជីវៈចម្រុះ អនុសញ្ញាក្របខណ្ឌសហប្រជាជាតិស្តីពីការបែ្រប្រួលអាកាសធាតុ និងអនុសញ្ញសហប្រជាជាតិប្រយុទ្ធប្រឆាំងនឹងរហោស្ថានកម្ម។
ក្នុងកិច្ចប្រជុំនេះ គម្រោងបានបង្ហាញពីសមិទ្ធិផល ជាច្រើនដែលគម្រោងផលិតបានកន្លងមក រួមមានឯកសារ សៀវភៅ ផ្ទាំងព័ត៌មានដែលបានបោះពុម្ភរួចរាល់ វីដេអូឯកសារ គេហទំព័រផ្លូវការរបស់គម្រោងរីយ៉ូទាំងបី និងគម្រោងសាកល្បងនៃការបង្កើតមជ្ឈមណ្ឌលស្រាវជ្រាវ និងអភិរក្សកេសរកូល សុខ អាន ភ្នំគូលែន។
