សម្តេចវិបុលសេនាភក្តីសាយឈុំ ប្រធានព្រឹទ្ធសភាកម្ពុជាបានចាត់ទុកសភារុស្ស៊ីជាដៃគូដ៏ល្អ នៅតំបន់អាស៊ី-ប៉ាស៊ីហ្វិកដែលបានជួយគាំទ្រប្រទេសកម្ពុជាក្នុងគ្រាលំបាកនាពេលកន្លងមករហួតធ្វើឲ្យកម្ពុជាមានសន្តិភាព និងការអភិវឌ្ឍលើគ្រប់វិស័យ ។
សម្តេចវិបុលសេនាភក្តីសាយ ឈុំប្រធានព្រឹទ្ធសភាមានប្រសាសន៍ថា ប្រទេសុស្ស៊ី បានជួយគាំទ្រ និងជួយជ្រោមជ្រែងកម្ពុជាលើគ្រប់វិស័យក្នុងកាលៈទេសៈក្នុងគ្រាលំបាកបន្ទាប់ពីកម្ពុជារំដោះរួចចេញពីរបបប្រល័យ ពូជសាសន៍ ប៉ុល ពត ហើយធ្វើឲ្យមានកម្ពុជាមានភាពស្មើមុខស្មើមាត់ និងរីករាចំរើនដូចបណ្តាប្រទេសផ្សេងៗនៅលើសកលលោក។
សម្តេចប្រធានព្រឹទ្ធសភាលើកឡើងបែបនេះ ក្នុងឱកាសទទួលជួបសវនាការជាមួយនឹង ឯកឧត្តម អង់ត្រេគ្លីម៉ូវ( Andrei Klimov) អនុប្រធានគណៈកម្មាធិការកិច្ចការបរទេសនៃក្រុមប្រឹក្សាសហព័ន្ធរុស្ស៊ីនារសៀលថ្ងៃទី១៤ខែមករា នៅសណ្ឋាគារ Angkor Palace Resort ។
នៅក្នុងឱកាសនោះសម្តេចបានវាយតម្លៃខ្ពស់ចំពោះទាក់ទំនង មិត្តភាព សាមគ្គីភាព និងកិច្ចសហប្រតិបត្តិការរវាងប្រទេសទាំងពីរ ដែលកាន់តែរីកចម្រើននិងរឹងមាំជាបន្តបន្ទាប់ និងមានការគាំទ្រគ្នាទៅវិញទៅមកនៅក្នុងក្របខណ្ឌអន្តរជាតិ។
សម្តេចប្រធានព្រឹទ្ធសភាថ្លែងអំណរគុណចំពោះប្រទេសរុស្ស៊ីដែលបានបញ្ជូនអ្នកសង្កេតមកសង្កេតការណ៍បោះឆ្នោតជ្រើសតាំងតំណាងរាស្រ្ត នីតិកាលទី៦ ដែលនឹងប្រព្រឹត្តទៅនៅថ្ងៃទី២៩ ខែកក្កដា ឆ្នាំ២០១៨ និងផ្តល់បទពិសោធន៍ជាច្រើននៅក្នុងវិស័យគ្រប់គ្រងសន្តិសុខ និងសង្គម។ ជាក់ស្តែងការអញ្ជើញមកចូលរួមកិច្ចប្រជុំប្រចាំឆ្នាំលើកទី២៧ នៃវេទិកាសភាអាស៊ី-ប៉ាស៊ីហ្វិក និងក្នុងឱកាសការប្រកាសបង្កើតក្រុមប្រឹក្សាវប្បធម៌អាស៊ី ដែលប្រព្រឹត្តទៅពីថ្ងៃទី១៤ ដល់ថ្ងៃទី១៧ ខែមករា ឆ្នាំ២០១៩ នៅខេត្តសៀមរាបរបស់ថ្នាក់ដឹកនាំសភារុស្ស៊ីនៅពេលនេះ គឺជាការលើកទឹកចិត្តដល់ប្រទេសកម្ពុជាដែលធ្វើជាម្ចាស់ផ្ទះ និងជាការចូលរួមចំណែកដល់ការពង្រឹងពង្រីកទំនាក់ទំនងមិត្តភាព សាមគ្គីភាព និងកិច្ចសហប្រតិបត្តិការរវាងប្រទេស និងប្រជាជនទាំងពីរ កម្ពុជា-រុស្ស៊ី។
ឯកឧត្តម អង់ត្រេគ្លីម៉ូវ( Andrei Klimov) បានបញ្ជាក់ថា ប្រទេសរុស្ស៊ី និងប្រទេសកម្ពុជាគឺជាដៃគូដ៏ល្អនៅក្នុងតំបន់អាស៊ី ប៉ាស៊ីហ្វីក ហើយទំនាក់ទំនងសាមគ្គីភាព មិត្តភាពណនិងកិច្ចសហប្រតិការរវាងប្រជាជន និងប្រទេសទាំងពីរ បានឆ្លើយតបទៅនឹងតម្រូវការរួម ព្រមទាំងបានរួមចំណែកពង្រឹងដល់ឯករាជភាព អធិបតេយ្យភាព និងការប្រឆាំងចំពោះការជ្រៀតជ្រែកពីប្រទេសខាងក្រៅ៕