ភាគច្រើននៃស្រូវប្រាំងប្រមាណ ១៣.០០០ ហិកតា នៅតំបន់អាងត្រពាំងថ្ម ប្រឈមនឹងការខូចខាត

បន្ទាប់ពីបានចុះពិនិត្យ និងដោះស្រាយទឹកសម្រាប់ការប្រើប្រាស់ នៅក្នុងស្រុកមង្គលបូរី រួចមក នៅរសៀលថ្ងៃចន្ទ ១រោច ខែបុស្ស ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី ២១ ខែមករា ឆ្នាំ ២០១៩ ឯកឧត្តម ចាន់ យុត្ថា រដ្ឋលេខាធិការក្រសួងធនធានទឹក និងឧតុនិយម បានបន្តដំណើរចុះពិនិត្យស្ថានភាពទឹកនៅក្នុងអាងត្រពាំងថ្ម ស្ថិតនៅក្នុងស្រុកភ្នំស្រុក ខេត្តបន្ទាយមានជ័យ ។

លោក យឹម ប៊ុនរ៉ុម ប្រធានមន្ទីរធនធានទឹក និងឧតុនិយមខេត្តបន្ទាយមានជ័យ បានរាយការណ៍ជូនឯកឧត្តមរដ្ឋលេខាធិការ ជ្រាបថា ចំពោះស្រូវប្រាំងលើកទី ១ បានប្រមូលផលស្ទើរតែទាំងស្រុងហើយ ។ ប៉ុន្តែអ្វីដែលជាការព្រួយបារម្ភ គឺស្រូវប្រាំងលើកទី ២ ដែលមានអាយុប្រមាណ ១ ខែ និងបានបង្កបង្កើនផលលើផ្ទៃដីប្រមាណ ១៣.០០០ ហិកតា ប្រឈមនឹងការខូចខាតច្រើន ។ លោក យឹម ប៊ុនរ៉ុម បន្តថា ក្នុងរដូវវស្សាឆ្នាំ ២០១៨ តំបន់អាងត្រពាំងថ្ម បានទទួលរបបទឹកភ្លៀងតែប្រមាណ ៨០០ មម ប៉ុណ្ណោះ ។ របាយទឹកភ្លៀងនេះ ជាកត្តាធ្វើឲ្យអាងត្រពាំងថ្ម ពុំមានទឹកស្តុកបរិបូណ៍ ដូចបណ្តាឆ្នាំកន្លងទៅទេ ។ ចំពោះបញ្ហានេះ ឯកឧត្តម លឹម គានហោ រដ្ឋមន្ត្រីក្រសួងធនធានទឹក និងឧតុនិយម បានបញ្ជាឲ្យបើកទឹកពីអាងទឹកស្ទឹងស្រែង ២ ស្ថិតក្នុងស្រុកចុងកាល់ ខេត្តឧត្តរមានជ័យ បញ្ចូលមកអាងត្រពាំងថ្ម តាំងពីពាក់កណ្តាលខែមេសា ឆ្នាំ ២០១៨ មកម៉្លេះ ។ ប៉ុន្តែទឹកទាំងនោះ ក៏ត្រូវបានយកទៅប្រើប្រាស់ជាបន្តបន្ទាប់ក្នុងការអន្តរាគមន៍ស្រូវបង្កើនរដូវ ស្រូវវស្សា និងស្រូវប្រាំងលើកទី ១ ។