ទីក្រុងឡុងដ៍ ៖ ថ្នាក់ដឹកនាំក្រសួងអប់រំ យុវជន និងកីឡា ដឹកនាំដោយឯកឧត្ដមបណ្ឌិតសភាចារ្យ ហង់ ជួន ណារ៉ុន រដ្ឋមន្ត្រី បានជួបប្រជុំពិភាក្សាជាមួយតំណាងក្រសួងអប់រំចក្រភពអង់គ្លេសឯកឧត្ដម Christopher James Skidmore រដ្ឋមន្ត្រីឧត្ដមសិក្សា ស្ដីពី កិច្ចសហប្រតិបត្តិការភាពជាដៃផ្លាស់ប្តូរនិស្សិត សាស្ត្រាចារ្យ និងការរៀបចំពិព័រណ៍គ្រឹះស្ថានឧត្ដមសិក្សារវាងចក្រភពអង់គ្លេស និងព្រះរាជាណាចក្រកម្ពុជា ដែលផ្ដោតពិសេសលើមុខវិជ្ជាវិទ្យាសាស្ត្រ បច្ចេកវិទ្យា វិស្វកម្ម និងគណិតវិទ្យា (STEM)។
កិច្ចប្រជុំនេះ ប្រព្រឹត្តឡើងនាថ្ងៃអង្គារ ០២រោច ខែបុស្ស ឆ្នាំច សំរឹទ្ធិស័ក ព.ស.២៥៦២ ត្រូវនិងថ្ងៃទី២២ ខែមករា ឆ្នាំ២០១៩ ក្នុងអំឡុងពេលដែលគណៈប្រតិភូជាន់ខ្ពស់ក្រសួងអប់រំ យុវជន និងកីឡា អញ្ជើញចូលរួមវេទិកាអប់រំសាកលឆ្នាំ២០១៩ ក្រោមប្រធានបទ “What we should do with what we know: Developing education policy for implementation, impact and exponential success” ដែលកំពុងធ្វើឡើងនៅទីក្រុងឡុងដ៍ ចក្រភពអង់គ្លេស។