កំពត៖ តាមរយៈលំហូរចូលនៃអ្នកវិនិយោគចម្រុះជាតិសាសន៍ក្នុងឆ្នាំនេះ នឹងធ្វើឱ្យខេត្តកំពតរីកចម្រើនយ៉ាង គំហុកចាប់ពីឆ្នាំ២០២០ ខាងមុខ។ សមិទ្ធផលដែលផ្តើមលេចធ្លោគឺសំណង់អគារតូចធំព្រោះជាតម្រូវការចាំបាច់សម្រាប់ដំណើរការគ្រប់វិស័យ។
ឯកឧត្តម ជាវ តាយ អភិបាលខេត្តកំពតបានមានប្រសាសន៍ថា ថ្មីៗនេះមានអ្នកវិនិយោគទុនចម្រុះជាតិសាសន៍ ដូចជា កូរ៉េ ចិន ជប៉ុន ថៃបានចូលមកពិភាក្សាដើម្បីចាប់ដៃរកស៊ី និងចូលរួមអភិវឌ្ឍ។ ជាការរំពឹងទុក ចាប់ពីឆ្នាំ២០២០ ស្ថានភាពក្នុងខេត្តកំពតនឹងប្រែប្រួលដ៏គំហុកតាមរយៈសំណង់អគារតូចធំដែលជាតម្រូវការចាំបាច់នឹងលេចឡើងបន្តបន្ទាប់សម្រាប់ដំណើរការលើវិស័យនានា។
ឯកឧត្តមអភិបាលខេត្តបានបន្តថា បច្ចុប្បន្នការសាងសង់អគារផ្ទះល្វែងរបស់ប្រជាពលរដ្ឋកំពុងកើតមានយ៉ាងរស់រវើក ពិសេសក្នុងក្រុងកំពត។ ជាមួយសកម្មភាពទាំងនោះក៏មានភាពអនាធិបតេយ្យកើតឡើង ដោយសំណង់ខ្លះបានបំពានលើដីចំណីព្រែកដែលជាទ្រព្យសម្បត្តិសាធារណៈរបស់រដ្ឋ។ ត្រង់ចំណុចនេះមិនសម្រាប់តែក្រុងកំពតទេ មន្ត្រីជំនាញ និងអាជ្ញាធរពាក់ព័ន្ធត្រូវមានវិធានការបង្ការទប់ស្កាត់ចំពោះករណីទន្រ្ទានយកដីព្រែក ការកាយភ្នំជាដើម។
ឯកឧត្តម ជាវ តាយ បានបន្តថា តាមរយៈអង្គសន្និបាតនេះ សមាជិក សមាជិកាទាំងអស់ត្រូវលើកយកបញ្ហាលើ្មសច្បាប់ទាក់ទិនដីធ្លីមកជជែកពិភាក្សាជាប្រធានបទ ព្រោះជាករណីក្តីគគុកដើម្បីឈានទៅអនុវត្ត និងគោរពច្បាប់ទាំងអស់គ្នា។ បើមិនបានគិតគូរ និងយកវិធានការច្បាប់មកអនុវត្តទេ នោះអ្នករំលោភ បំពានទ្រព្យសម្បត្តិសាធារណៈរបស់រដ្ឋនៅតែបន្តធ្វើតាមទំនើងចិត្តដូចដែលបានប្រព្រឹត្តជារឿយៗកន្លងមក។ រដ្ឋបាលខេត្តត្រូវតែយកចិត្តទុកដាក់លើករណីទាំងនេះដើម្បីថែរក្សានូវអ្វីដែលជារបស់រដ្ឋឱ្យបានគងវង្សក្នុងគោលបំណងសម្រាប់ជាប្រយោជន៍ដល់សាធារណជនទូទៅ៕
