(ភ្នំពេញ)៖ នៅថ្ងៃអង្គារ ១៤រោច ខែមាឃ ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី០៥ ខែមីនា ឆ្នាំ២០១៩ ឯកឧត្តម ប៉ាន សូរស័ក្ដិ រដ្ឋមន្ត្រីក្រសួងពាណិជ្ជកម្ម បានទទួលជួបសម្ដែងការគួរសម និងជម្រាបលាពី ឯកឧត្តម ចច អេដហ្កា (George Edgar) ឯកអគ្គរដ្ឋទូតសហភាពអឺរ៉ុបប្រចាំប្រទេសកម្ពុជា ដែលនឹងត្រូវចប់អាណត្តិនៅក្នុងពេលដ៏ខ្លីនេះ។
ជាកិច្ចចាប់ផ្ដើម ឯកឧត្តមរដ្ឋមន្ត្រី បានវាយតម្លៃខ្ពស់ចំពោះការងាររបស់ឯកឧត្តម អេដហ្កា ក្នុងបេសកកម្មរបស់ឯកឧត្តម ជាមន្ត្រីតំណាងការទូត ហើយក៏បានសាកសួរបន្តអំពីដំណើរការបន្ទាប់ក្រោយពីសហភាពអឺរ៉ុបបានចាប់ផ្ដើមនៃនីតិវិធីពិនិត្យការព្យួរជាបណ្ដោះអាសន្នប្រព័ន្ធអនុគ្រោះ EBA ពីកម្ពុជា ជាពិសេសបេសកកម្មនានារបស់គណៈកម្មការអឺរ៉ុប ក្នុងដំណាក់កាល ៦ ខែដំបូង។
ជាកិច្ចឆ្លើយតប ឯកឧត្តម អេដហ្កា បានថ្លែងអំណរគុណចំពោះកិច្ចសហប្រតិបត្តិការដ៏ល្អកន្លង ហើយក៏បានជម្រាបជូនថា ទាក់ទងនឹងបេសកកម្មរបស់គណៈកម្មការអឺរ៉ុប ឯកឧត្តមមិនទាន់បានទទួលនូវព័ត៌មានជាក់លាក់នៅឡើយទេនៅពេលនេះ ប៉ុន្តែអាចនឹងមានក្រុមការងារមកប្រទេសកម្ពុជាក្នុងអំឡុងពេលចុងខែមីនា និងខែមេសា ខាងមុខ។
ក្រៅពីនេះផងដែរ ឯកឧត្តម អេដហ្កា បានជម្រាបជូនពីគម្រោងដែលផ្ដល់ហិរញ្ញប្បទានដោយសហភាពអឺរ៉ុប និងក្រសួងសហប្រតិបត្តិការសេដ្ឋកិច្ច និងអភិវឌ្ឍន៍នៃប្រទេសអាល្លឺម៉ង់ មានឈ្មោះថា ARISE+Cambodia ដែលអនុវត្តដោយអង្គការ GIZ។ គម្រោងនេះកំពុងតែត្រៀមចាប់ផ្ដើមការអនុវត្ត ហើយ ឯកឧត្តមបានស្នើសុំឲ្យក្រសួងពាណិជ្ជកម្ម សហការជាមួយគម្រោងនេះក្នុងនាមក្រសួងពាណិជ្ជកម្មជាចំណុចបង្គោលរបស់រាជរដ្ឋាភិបាលជាមួយគម្រោងនេះ។
ឯកឧត្តមរដ្ឋមន្ត្រី បានឆ្លើយតបថា ក្រសួងស្វាគមន៍ជានិច្ចការគាំទ្របន្តពីសហភាពអឺរ៉ុប ក្នុងការជួយអភិវឌ្ឍន៍វិស័យពាណិជ្ជកម្មនៅកម្ពុជា ហើយឯកឧត្តមនឹងចាត់ចែងក្រុមការងារសម្រាប់ធ្វើការជាមួយអង្គការ GIZ ដើម្បីអនុវត្តគម្រោងនេះ ដោយគម្រោងនេះមានសក្ដានុពលក្នុងការជួយកំណែទម្រង់កាំកុងត្រូល រៀបចំគោលនយោបាយពាណិជ្ជកម្ម កិច្ចសម្រួលពាណិជ្ជកម្ម និងការងារដទៃទៀត ដែលចាំបាច់សម្រាប់កម្ពុជាក្នុងបរិបទបច្ចុប្បន្ន។
មុននឹងបញ្ចប់ ឯកឧត្តមរដ្ឋមន្ត្រី ក៏បានជូនពរដល់ ឯកឧត្តម អេដហ្កា ឲ្យទទួលបាននូវជ័យជម្នះលើគ្រប់ភារកិច្ចដែលឯកឧត្តម នឹងទទួលបាននូវថ្ងៃអនាគត។