(កណ្ដាល)៖ ឯកឧត្តម ហ៊ីង ប៊ុនហៀង បានលើកឡើងថា កម្ពុជានៅក្រោមការដឹកនាំរបស់រាជរដ្ឋាភិបាល ដែលដឹកនាំដោយសម្ដេចតេជោ ហ៊ុន សែន បានផ្សាភ្ជាប់ជាមួយនឹងវិស័យសាសនា ដោយផ្អែកលើការធ្វើបុណ្យ ការធ្វើអំពើល្អជាមួយប្រជាពលរដ្ឋ ធ្វើឲ្យប្រទេសជាតិរីកចម្រើន និងការអភិវឌ្ឍន៍។
ការលើកឡើងរបស់ ឯកឧត្តម ហ៊ីង ប៊ុនហៀង ត្រូវបានធ្វើឡើងនៅព្រឹកថ្ងៃទី០៧ ខែមីនា ឆ្នាំ២០១៩នេះ ក្នុងឱកាសអញ្ជើញតំណាងសម្ដេចតេជោ ហ៊ុន សែន នៅក្នុងពិធីបញ្ចុះខណ្ឌសីមាព្រះវិហារ និងសម្ពោធសមិទ្ធផលនានា ក្នុងវត្តវិហារត្រាញ់ នៅឃុំព្រែកស្លែង ស្រុកកណ្តាលស្ទឹង ខេត្តកណ្តាល។
ក្នុងរបាយការណ៍របស់ ឯកឧត្តម បូរ ណារ៉េត អភិបាលស្រុកកណ្តាលស្ទឹង បានឲ្យដឹងថា សមិទ្ធផលនានានៅក្នុងវត្តវិហារត្រាញ់ ដែលសម្ពោធនាពេលនេះ មានព្រះវិហារ១ខ្នង ទំហំ១២ម៉ែត្រ គុណ២៤ម៉ែត្រ, កុដិ្ឋ២ខ្នង, សាលាធម្មសភា១ខ្នង, ក្លោងទ្វារ, ដងទង់, សាលាបឋមសិក្សា១ខ្នង ៥បន្ទប់, ចាក់បេតុងក្នុងវត្ត និងសមិទ្ធិផលមួយចំនួនទៀត សរុបចំណាយអស់ថវិកា៦៦៥,៦៨៨ដុល្លារ ដែលជាសទ្ធាជ្រះថ្លាពីសំណាក់លោក ហ៊ីង ប៊ុនហៀង និងលោកស្រី ព្រមទាំងសប្បុរសជន ពុទ្ធបរិស័ទជាច្រើនទៀត។
ឯកឧត្តម ហ៊ីង ប៊ុនហៀង បានបញ្ជាក់ទៀតថា សមិទ្ធផលថ្ងៃនេះ គឺជាសមិទ្ធផលដែលបានកើតឡើងដោយសារសុខសន្តិភាព នៃនយោបាយឈ្នះ ឈ្នះរបស់សម្តេចតេជោ ហ៊ុន សែន ហើយគោលនយោបាយរបស់រាជរដ្ឋាភិបាល បានខិតខំណាស់ដើម្បីបម្រើប្រជាពលរដ្ឋ។ ដូច្នេះអាជ្ញាធរត្រូវធ្វើបុណ្យ ជាមួយប្រជាពលរដ្ឋ ធ្វើអំពើល្អជាមួយប្រជាពលរដ្ឋ និងបម្រើប្រជាពលរដ្ឋដោយមិនទុកពួកគាត់ចោលនោះទេ ហើយត្រូវខិតខំដោះស្រាយជូនពួកគាត់ និងសូមប្រជាពលរដ្ឋចូលរួមអនុវត្តគោលនយោបាយ នៅក្នុងការកសាងហេដ្ឋារចនាសម្ព័ន្ធ និងសមិទ្ធផលផ្សេងៗ ដើម្បីផលប្រយោជន៍រួម។
ក្នុងនាមសម្ដេចតេជោ ហ៊ុន សែន,ឯកឧត្តម ហ៊ីង ប៊ុនហៀង បានប្រគេនបច្ច័យដល់វត្តវិហារត្រាញ់ ចំនួន៣៥,០០០ដុល្លារ និងប្រាក់រៀល ចំនួន១៦៦លាន ៣៥ម៉ឺនរៀល។ ព្រមទាំងបាននាំយកអំណោយរបស់សម្ដេចតេជោ និងសម្ដេចកិត្តិព្រឹទ្ធបណ្ឌិត ជាច្រើនទៀត ចែកជូនដល់លោកតា លោកយាយជី, ក្រុមប្រឹក្សាឃុំ, អាជ្ញាធរដែនដីស្រុក ប្រជាពលរដ្ឋ យុវជន គ្រូពេទ្យ លោកគ្រូអ្នកគ្រូ សិស្សានុសិស្ស និងកងកម្លាំងប្រដាប់អាវុធផងដែរ៕
