រដ្ឋមន្ត្រីពាណិជ្ជកម្ម ពន្យល់សមាជិកព្រឹទ្ធសភាអាមេរិក អំពីវិស័យសក្តានុពល និងឱកាសវិនិយោគនៅកម្ពុជា

ឯកឧត្តមរដ្ឋមន្ត្រី បានស្នើ ឯកឧត្តម ដុក អេរិកសិន និងលោក ជេយ រូដនី ជួយកៀងគរវិនិយោគិនអាមេរិក ឱ្យចូលមកបណ្តាក់ទុនថែមទៀតនៅកម្ពុជា លើវិស័យដែលមានសក្តានុពលសំខាន់ៗដូចជា៖ ឧស្សាហកម្ម (គ្រឿងបន្លាស់រថយន្ត និងវាយនភណ្ឌ) ទេសចរណ៍ ហេដ្ឋារចនាសម្ព័ន្ធ ថាមពល បរិស្ថាន និងកសិកម្ម ដោយសារកម្ពុជា មានធនធានធម្មជាតិមិនទាន់កែច្នៃជាច្រើន ដែលធុរជនអាមេរិក អាចអភិវឌ្ឍន៍ខ្សែចង្វាក់តម្លៃ ដើម្បីទាញយកប្រាក់ចំណេញខ្ពស់ពីការនាំចេញ។

ជាការឆ្លើយតប ឯកឧត្តម ដុក អេរិកសិន និងលោក ជេយ រូដនី បានថ្លែងអំណរគុណ ឯកឧត្តមរដ្ឋមន្ត្រីដែលបានចែករំលែកនូវព័ត៌មានទាក់ទងវិស័យសក្តានុពល និងឱកាសវិនិយោគនៅកម្ពុជា និងបានសន្យានាំយកដំណឹងទាំងអស់នេះ ទៅផ្សព្វផ្សាយដល់សហគមន៍ធុរកិច្ចនៅក្នុងសហរដ្ឋអាមេរិក ដើម្បីជំរុញការវិនិយោគពីអាមេរិក មកកាន់កម្ពុជា ឱ្យបានកាន់តែច្រើន សំដៅពង្រឹងទំនាក់ទំនងប្រទេសទាំងពីរ។

នៅក្នុងឱកាសនោះដែរ ឯកឧត្តម ដុក អេរិកសិន និងលោក ជេយ រូដនី បានកោតសរសើរអំពីវឌ្ឍនភាព និងកំណើនសេដ្ឋកិច្ចដ៏រឹងមាំរបស់កម្ពុជា នៅក្រោមការដឹកនាំរបស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃកម្ពុជា ព្រមទាំងវប្បធម៌ និងភាពរួសរាយរាក់ទាក់របស់ប្រជាជនខ្មែរ ដែលបានឆក់បេះដូងអ្នកនយោបាយទាំងពីរ ឱ្យវិលត្រលប់មកកម្ពុជាសារជាថ្មី នៅពេលខាងមុខ។