គណបក្សប្រជាជនកម្ពុជា ដែលដឹកនាំរាជរដ្ឋាភិបាល បានបន្តការជួយដោះស្រាយបញ្ហាអាទិភាពប្រជាជនបន្ថែមទៀត ក្រោយកិច្ចប្រឹងប្រែងស្រាយបញ្ហាស្មុគស្មាញមួយចំនួន ទាក់ទងនឹងការអនុវត្តច្បាប់ចរាចរណ៍ថ្មី ។
នាពេលនេះ បញ្ហាដែលស្នើដោយប្រជាជន ចេះតែលេចឡើង បន្ទាប់ពីសំណើមួយចំនួនត្រូវបានដោះរួចរាល់។ ក្នុងមហាសន្និបាតមួយរបស់គណបក្សរយៈពេល ២ថ្ងៃ នាចុងសប្តាហ៍កន្លងមកនេះ យ៉ាងហោចសេចក្តីសម្រេចចំនួន ២ថែមទៀត បានឆ្លើយតបពីប្រមុខរាជរដ្ឋាភិបាល ។
សម្តេចតេជោនាយរដ្ឋមន្ត្រី ហ៊ុន សែន បានសម្រេចជាផ្លូវការ ការលើកលែងពន្ធប្រថាប់ត្រាលើការផ្ទេរកម្មសិទ្ធិ ឬសិទ្ធិកាន់កាប់អចលនទ្រព្យ និងសម្តេច បានជួយសម្រូលលើថ្លៃអគ្គីសនី ជូនប្រជាពលរដ្ឋជាបន្តទៀតនៅឆ្នាំ ២០១៧ ខាងមុខ ។ ក្នុងហ្វេសប៊ុករបស់សម្តេច បានចុះហត្ថលេខាស្តីពីការលើកលែងពន្ធ ប្រថាប់ត្រាលើការផ្ទេរកម្មសិទ្ធិ ឬសិទ្ធិកាន់កាប់អចលនទ្រព្យរវាងឪពុក ម្តាយបង្កើត និងកូនបង្កើត… រវាងប្តីប្រពន្ធ និងរវាង យាយ តា ចៅបង្កើត ថែមទៀតផងដែរ ។ ក្រៅពីការសម្រេចលើកលែងពន្ធប្រថាប់ត្រា លើការផ្ទេរកម្មសិទ្ធិនេះទៀត សម្តេចបានសរសេរក្នុងហ្វេសប៊ុកថា ចាប់ពីខែមេសា ឆ្នាំ ២០១៧ ទៅ… ប្រជាពលរដ្ឋដែលប្រើប្រាស់បណ្តាញអគ្គីសនីរដ្ឋក្នុងបរិមាណពី ៥០គីឡូវ៉ាត់ម៉ោង ក្នុងមួយខែចុះក្រោម គឺតម្រូវបង់ថ្លៃត្រឹមតែ ៦១០រៀល តែប៉ុណ្ណោះ។
គួររលឹកថា ជាមួយនឹងការដោះស្រាយជាបន្តបន្ទាប់នេះ ការស្នើសុំបន្ថែមទៀតពីសាធារណជន ត្រូវគេឃើញបានលេចឡើងជាលំដាប់ ។ ពេលនេះសេចក្តីស្នើសុំមួយទៀត បានលើឡើងពីក្រុមដែលបានទិញរថយន្តទំនើបគ្មានពន្ធ ។ ក្រុមអ្នកទិញរថយន្តគេចពន្ធជាច្រើនដោយសារការតម្រូវរបស់គយរដ្ឋាករ ត្រូវបង់ពិន័យលើពន្ធនាំចូល ពួកគេជាច្រើននៅមិនទាន់បានចូលបង់ពន្ធនៅឡើយទេ ។
យោងតាមអគ្គស្នងការដ្ឋាននគរបាលជាតិ ក្នុងរយៈពេល ១១ថ្ងៃ ដែលមានការអនុវត្តច្បាប់ចរាចរណ៍ផ្លូវគោកថ្មី រថយន្តដែលចូលបង់ពន្ធគយមានចំនួនតែ ៧គ្រឿង តែប៉ុណ្ណោះ ដែលរថយន្តទំនើបគេចពន្ធជាច្រើន នៅតែបន្តការគេចវេស ។ ក្រុមទាំងឡាយនោះ បានសរសេរស្នើរកការជួយអន្តរាគមន៍ពីរាជរដ្ឋាភិបាល ដើម្បីបញ្ឈប់លើការបង់ប្រាក់ពិន័យ ។ យោងតាមច្បាប់ យានយន្តនាំចូលក្រោមសេរីឆ្នាំ ២០១៣ ចុះទៅ នឹងតម្រូវការបង់ប្រាក់ពិន័យ ១៥ភាគរយ បន្ថែមពីលើពន្ធនាំចូល… ចំណែករថយន្តទំនើបណាផលិតចាប់ពីឆ្នាំ ២០១៤ ឡើងទៅ ត្រូវបង់ពិន័យ ២០ភាគរយ ពីលើពន្ធនាំចូល... ប៉ុន្តែក្រុមអ្នកទិញរថយន្តគេចពន្ធ បានស្នើសុំអោយរាជរដ្ឋាភិបាលពិចារណា ការបញ្ឈប់លើការបង់ប្រាក់ពិន័យ ១៥ និង ២០ភាគរយ នោះ ។ សេចក្តីស្នើថ្មី នៅមិនទាន់មានការឆ្លើយតបពីរាជរដ្ឋាភិបាលនោះឡើយ ។
