រាជធានីភ្នំពេញ ៖ កិច្ចប្រជុំការងារបច្ចេកទេសចម្រុះវិស័យអប់រំ ប្រារព្ធឡើងដើម្បីពិនិត្យ វាយតម្លៃ វឌ្ឍនភាពការងារ និងលទ្ធផលដែលសម្រេចបាន ក្នុងគោលដៅដាក់ចេញនូវផែនការយុទ្ធសាស្ត្របន្ត ដើម្បីជំរុញគុណភាពអប់រំនៅកម្ពុជាកាន់តែប្រសើរឡើង។
កិច្ចប្រជុំនេះត្រូវបានរៀបចំឡើងក្រោមអធិបតីភាព ឯកឧត្ដមបណ្ឌិតសភាចារ្យ ហង់ ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា និងមានការចូលរួមពី ឯកឧត្តម លោកជំទាវថ្នាក់ដឹកនាំក្រសួងអប់រំ យុវជន និងកីឡា ក្រសួងពាក់ព័ន្ធ និងក្រុមការងារបច្ចេកទេសចម្រុះវិស័យអប់រំរបស់ដៃគូអភិវឌ្ឍប្រមាណ ៦០រូប នារសៀលថ្ងៃអង្គារ ០២កើត ខែជេស្ឋ ឆ្នាំកុរ ឯកស័ក ព.ស.២៥៦៣ នៅទីស្ដីការក្រសួងអប់រំ យុវជន និងកីឡា។
ក្នុងឱកាសនោះឯកឧត្តមបណ្ឌិតសភាចារ្យបានឯកភាពលើ ការអនុវត្តថវិកាកម្មវិធី២០១៩ ការអនុម័តផែនការយុទ្ធសាស្រ្តវិស័យអប់រំ ២០១៩-២០២៣ ព្រមទាំងបានផ្តល់អនុសាសន៍បន្ថែម ដល់ក្រុមការងារបច្ចេកទេសចម្រុះវិស័យអប់រំ និងដៃគូអភិវឌ្ឍ ការអនុវត្តន៍ គម្រោងភាពជាដៃគូសកលសម្រាប់ការអប់រំលើកទី៣ បេសកកម្ម វឌ្ឍនភាពនៃអនុសរណយោគយល់ និងគម្រោងវិនិយោគ ឱ្យបន្តការអនុវត្តន៍របស់ខ្លួនដើម្បីទទួលបានលទ្ធផលប្រកបដោយប្រសិទ្ធភាពខ្ពស់៕
