នាព្រឹកថ្ងៃអាទិត្យ ៧កើត ខែជេស្ឋ ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី៩ ខែមិថុនា ឆ្នាំ២០១៩ ឯកឧត្តម ម៉ម ប៊ុននាង ប្រធានគណៈកម្មការទី១០ព្រឹទ្ធសភា បានអញ្ជើញជួបសំណេះសំណាល និងហូបនំបញ្ចុកសាមគ្គីភាព អាជ្ញាធរឃុំគោកត្រប់ សរុបចំនួន១៥២១នាក់ ដើម្បីពង្រឹងសាមគ្គីភាព មិត្តភាព និងឯកភាពជាតិខ្មែរ ដោយមិនរើសអើងបក្សនយោបាយណាមួយឡើយ ស្ថិតនៅឃុំគោកត្រប់ ស្រុកកណ្តាលស្ទឹង ខេត្តកណ្តាល៕
ឯកឧត្តម បានរំលឹកអំពីប្រវត្តិ “នំបញ្ចុកខ្មែរ”ដោយពាក្យថានំបញ្ចុកនេះមានឈ្មោះដើមថា នំប៉ែនចុក គឺជានំដែលគេ យកម្សៅសម្រស់ទៅស្ងោរ ហើយបុកលាយទឹក រួចយកទៅច្រកក្នុងប៉ែនទើបយកស្នូលឈើ ចុកសង្កត់ ដើម្បីរោយទម្លាក់ជាសរសៃក្នុងទឹកពុះឲ្យឆ្អិន បន្ទាប់មកគេស្រង់ចាប់ជាចង្វាយៗ ដាក់ជាល ឬកញ្ច្រែង ទុកឲ្យស្រស់ទឹក។ ក្រោយមកគេហៅកាត់ៗថា នំបញ្ចុក។
ឯកឧត្តម ម៉ម ប៊ុននាង បានបញ្ជាក់ផងដែរថា ការហូបនំបញ្ចុកជុំគ្នានៅថ្ងៃទី ៩ មិថុនា នេះ គឺមិនមែនជាជំហានឆ្ពោះទៅរកការចរចារនយោបាយអ្វីឡើយ ប៉ុន្តែគឺជារឿងទទួលទាននំបញ្ចុករួមគ្នាដើម្បីពង្រឹងសាមគ្គីភាព មិត្តភាព និងឯកភាពខ្មែរតែប៉ុណ្ណោះដោយមិនរើសអើងបក្សនយោបាយណាមួយឡើយ គឺយើងអាចហូបរួមគ្នា។
ក្នុងឱកាសនោះ ឯកឧត្តមបានឧបត្ថម្ភថវិកាជូនដល់អ្នកប្រឡងចម្រៀងដែលជាប្រជាពលរដ្ឋក្នុងឃុំគោកត្រប់ ដោយលេខ១ទទួលបាន២០មឺុនរៀល លេខ២ទទួលបាន១០មឺុនរៀល លេខ៣ ទទួលបាន៥មឺុនរៀល អ្នកដែលមិនបានទទួលជ័យលាភីមានចំនួន៩នាក់ ក្នុងម្នាក់ៗទទួលបានថវិកា២មឺុនរៀល សរុបចំនួន១០នាក់ ចំណាយនំបញ្ចុក និងចំណាយផ្សេងៗ ដែលចំណាយថវិកាសរុបអស់១១,៨២៦,០០០រៀល៕
