មន្រ្តីក្រសួងសាធារណៈការ និងដឹកជញ្ជូនបានឲ្យចដឹងថា ការពង្រីកនិងចាក់កៅស៊ូបន្ថែមលើផ្លូវជាតិលេខ៤ ដែលមានប្រវែង២២៤គីឡូម៉ែត្រ នឹងបើកការដ្ឋានដំណើរការនៅចុងឆ្នាំនេះហើយ ជាមួយនឹងការចំណាយទឹកប្រាក់រហូតដល់១០០លានដុល្លារអាមេរិក។
ឯកឧត្តម វ៉ាស៊ីម សូរិយាអ្នកនាំពាក្យក្រសួងសាធារណៈការ និងដឹកជញ្ជូនបានមានប្រសាសន៍ឲ្យដឹងតាមទូរស័ព្ទ នារសៀលថ្ងៃទី១០ មិថុនានេះថា ឯកឧត្តមបានជួបជាមួយថ្នាក់ដឹកនាំក្រសួង ហើយឯកឧត្តមបញ្ជាក់ថាការចាក់កៅស៊ូបន្ថែម និងលើកកំពស់តួផ្លូវជាតិលេខ៤ នឹងចាប់ផ្តើមដំណើរការនៅចុងឆ្នាំនេះហើយ។ឯកឧត្តមបន្តថា គំរោងនេះត្រូវចំណាយអស់ថវិកា១០០លានដុល្លារអាមេរិក ដែលជាជំនួយរបស់ធនាគារពិភពលោកប្រចាំកម្ពុជា។
ឯកឧត្តមបន្តថា “ក្រោយពេលពង្រីក និងចាក់កៅស៊ូបន្ថែម នឹងធ្វើឲ្យទំហំផ្លូវនេះមានចាប់ពី៩ម៉ែត្រ ដល់១១ម៉ែត្រទទឹង”។លោកបន្តថា “ខ្ញុំមិនទាន់មានព៌តមានលំអិតទាក់ទងនឹងការលើកកំពស់តួផ្លូវមានប្រវែងប៉ុណ្ណានៅឡើយទេ”។
ឯកឧត្តម វ៉ាស៊ីម សូរិយាបានបន្តថា ផ្លូវជាតិដ៏សំខាន់នេះ នៅពេលចាក់កៅស៊ូចប់នឹងធ្វើឲ្យការធ្វើចរាចរណ៍នៅលើផ្លូវនេះ កាន់តែមានភាពល្អប្រសើរជាងមុន ដោយសារទំហំផ្លូវធំជាងមុន។ ឯកឧត្តម បន្តថា បច្ចុប្បន្នធនាគារពិភពលោក កំពុងតែធ្វើការដេញថ្លៃជ្រើសរើសក្រុមហ៊ុន ដើម្បីស្ថាបនាពង្រីក និងចាក់កៅស៊ូលើផ្លូវនេះ៕