រដ្ឋបាលខេត្តរនគិរីនៅព្រឹកថ្ងៃទី១៣ខែមិថុនា ឆ្នាំ២០១៩ សហការជាមួយមន្ទីរបរិស្ថានខេត្តរៀបចំប្រារព្ធទិវាអនាម័យបរិស្ថានជាតិ និងទិវាបរិស្ថានពិភពលោក ៥មិថុនា ឆ្នាំ២០១៩ ក្រោមប្រធានបទ (ការបំពុលខ្យល់)នៅអតីតព្រលានយន្តហោះខេត្តស្ថិតក្នុងភូមិ៧មករាសង្កាត់ឡាបានសៀកក្រុងបានលុងក្រោមអធិបតីភាពឯកឧត្តម ណាប់ ប៊ុនហេងប្រធានក្រុមប្រឹក្សាខេត្តនិងឯកឧត្តមថង សាវុនអភិបាលខេត្ត។
ទិវាបរិស្ថានខាងលើមានការចូលរួមពីថ្នាក់ដឹកនាំ មន្ត្រីរាជការ កងកម្លាំងប្រដាប់វុធទាំងបីប្រភេទ អាជ្ញាធរដែនដី សិស្ស និស្សិត យុវជន និងប្រជាពលរដ្ឋចូលរួមសរុបប្រមាណជាង២០០នាក់
ឯកឧត្តម ថង សាវុនអភិបាខេត្តមានប្រសាសន៍ថា ការរៀបចំទិវាអនាម័យបរិស្ថានជាតិ និងទិវាបរិស្ថានពិភពលោក ៥មិថុនា ឆ្នាំ២០១៩ ក្រោមប្រធានបទ “ការបំពុលខ្យល់” ក្នុងគោលបំណងបណ្តុះគំនិតប្រជាពលរដ្ឋឱ្យចេះស្រឡាញ់បរិស្ថាន ធ្វើឲ្យបរិស្ថានស្អាត គ្មានសំរាមពាសវាលពាសកាល បណ្តុះគំនិតស្មារតីឲ្យមហាជនទូទៅមានការយល់ដឹង និងការទុកដាក់សំរាមឱ្យបានត្រឹមត្រូវ ដើម្បីលើកកម្ពស់សោភ័ណភាព អនាម័យ ផាសុខភាព ជាកន្លែងដែលចង់រស់នៅទាំងអង្គភាពរដ្ឋ ទាំងឯកជនទូទៅដែលជាការរួមចំណែកក្នុងអភិវឌ្ឍសេដ្ឋកិច្ចជាតិផងដែរ ។ពិសេសស្របពេលដែលរដ្ឋបាលខេត្ត បាននិងកំពុងជំរុញឲ្យប្រជាពលរដ្ឋចូលរួមថែរក្សាអនាម័យបរិស្ថាន រួមទាំងការកែលម្អសោភ័ណភាពនៅទីរួមខេត្តឱ្យក្លាយជាទីក្រុងស្អាត ។ នៅក្នុងឱកាសនេះឯកឧត្តមប្រធានក្រុមប្រឹក្សាខេត្តនិងឯកឧត្តមអភិបាលខេត្តនិងអ្នកចូលរួមទាំងអស់បានធ្វើការដាំកូនឈើចម្រុះចំនួន៥០០ដើមផងដែរ៕