កំណាត់ផ្លូវជាតិលេខ៣តភ្ជាប់ចាប់ពីទីរួមខេត្តកំពត ទៅរង្វង់មូលវាលរេញ (ចំណុចប្រសព្វផ្លូវជាតិលេខ៤ និងលេខ៣) មានប្រវែងសរុប ៥៤,៣០គម ស្ថិតក្រោមគម្រោងជួសជុល និងសាងសង់ឡើងវិញ ជាប្រភេទផ្លូវបេតុងកៅស៊ូ(AC) គ្រោងនឹងបញ្ចប់នៅខែសីហាឆ្នាំ ២០១៩ខាងមុខនេះ។
ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូនបានដឹកនាំក្រុមការងារបច្ចេកទេស និងមន្ត្រីជាន់ខ្ពស់ក្រសួងចុះត្រួតពិនិត្យគុណភាពកំណាត់ផ្លូវជាតិលេខ៣ នៅថ្ងៃទី ១៣ ខែមិថុនា ឆ្នាំ ២០១៩ នេះបានឲ្យដឹងថា កំណាត់ផ្លូវនេះត្រូវបានចាប់ផ្ដើមជួសជុល និងសាងសង់ចាប់ពីខែកុម្ភៈឆ្នាំ២០១៨ ដោយប្រើប្រាស់ រយៈពេល៥៤ខែ អនុវត្តគម្រោងមានរយៈពេល១៨ខែ និងថែទាំប្រចាំរយៈពេល៣៦ខែ ចំណាយថវិកាប្រមាណ១២,០៦១លានដុល្លារសហរដ្ឋអាមេរិក។ ការជួសជុលនេះស្ថិតក្រោមគម្រោងឥណទានធនាគារពិភពលោក ហើយបច្ចុប្បន្នគម្រោងផ្លូវនេះអនុវត្តការជួសជុល និងសាងសង់សម្រេចបាន៦៧,៥០%ហើយ និងគ្រោងនឹងបញ្ចប់នៅខែសីហា ឆ្នាំ២០១៩ ខាងមុខនេះ។
ឯកឧត្តមបន្តថា ការចុះត្រួតពិនិត្យនេះ ក្រសួងបានរកឃើញថា ផ្នែកខ្លះនៃកំណាត់ផ្លូវនេះសាងសង់មិនទាន់ស្របតាមលក្ខណៈ បច្ចេកទេសដោយត្រង់ចំណុច ដែលបានជួសជុលរួចមានស្នាមបែក ប្រេះ និងសំបុកមាន់ដែលត្រូវចាត់វិធានការណ៍ ដោះស្រាយឲ្យបានទាន់ពេលវេលា។
ឯកឧត្តមទេសរដ្ឋមន្ត្រីស៊ុន ចាន់ថុលនានថ្លែងថា ជាមួយគ្នានេះបានដាក់កំហិតឲ្យក្រុមហ៊ុនពិនិត្យ និងកែតម្រូវឡើងវិញឲ្យបានត្រឹមត្រូវតាមបទដ្ឋានបច្ចេកទេស ទើបក្រសួងអាចទទួលយកបាន។ លោកទេសរដ្ឋមន្ត្រី បានបញ្ជាក់ពីគោលជំហរ ក្នុងការពង្រឹងការគ្រប់គ្រងលើការសាងសង់ឲ្យបានម៉ឺងម៉ាត់ ដើម្បីធានាគុណភាពផ្លូវប្រើប្រាស់ជាប់បានយូរអង្វែង ជាផលប្រយោជន៍សម្រាប់សេដ្ឋកិច្ចជាតិ និងសម្រាប់បម្រើដល់ភាពងាយស្រួល ក្នុងជីវភាពរស់នៅ និងការធ្វើដំណើរទៅមកព្រមទាំងប្រកបអាជីកម្មផ្សេងៗផងដែរ។
ឯកឧត្តមទេសរដ្ឋមន្ត្រីថា “ក្រសួងសាធារណការ និងដឹកជញ្ជូន ក៏ដូចជារាជរដ្ឋាភិបាលកម្ពុជា ប្រកាន់នូវគោលជំហរយើង “ឈប់ទទួលយកផ្លូវធ្វើជាប់ទៀតហើយ តែយកផ្លូវធ្វើមាំ”៕
