ក្រុមហ៊ុនយក្សមួយមកពីប្រទេសចិន គ្រោងនឹងសាងសង់អគារកប់ពពកនិងមជ្ឈមណ្ឌលកំសាន្តលំដាប់អន្តរជាតិ ជាលើកដំបូងនៅក្នុងទីរួមខេត្តកំពង់ចាមនាពេលឆាប់ៗខាងមុខនេះ។
គំរោងនេះត្រូវបានវិនិយោគដោយក្រុមហ៊ុនចិន Yue Tai Group Shanghai ខណៈបច្ចុប្បន្ននេះ ក្រុមហ៊ុននេះបាននឹងកំពុងឈួសឆាយដី ដើម្បីត្រៀមសាងសង់នាពេលខាងមុខ។
ឯកឧត្តម គួច ចំរើន អភិបាលខេត្តកំពង់ចាម ដែលនឹងត្រូវផ្ទេរដំណែងទៅកាន់ខេត្តព្រះសីហនុនាពេលខាងមុខឆាប់ៗនេះ បានឱ្យដឹងតាមទូរស័ព្ទនៅថ្ងៃទី ២៧ ខែមិថុនា ឆ្នាំ ២០១៩ នេះថា មកដល់ពេលនេះ ខេត្តមិនទាន់បានទទួលនូវព៌តមានជាក់លាក់ពីគម្រោងសាងសង់អគារនេះជាក់លាក់នៅឡើយទេ តែឃើញក្រុមហ៊ុននេះបាននឹងកំពុងធ្វើសកម្មភាពពិតប្រកដមែននៅក្នុងទឹកដីកំង់ចាមនេះ។
ឯកឧត្តមបន្តថា “ក្រុមហ៊ុននេះបានស្នើសុំសាងសង់សំណង់គំរូមួយ តែមិនមែនជាអគារកំពស់ប្រមាណ ១២៩.៦ម៉ែត្រនោះទេ តែនៅក្នុងមហិច្ឆិតារបស់ក្រុមហ៊ុននេះ ពិតជាមានការសងសង់អគារខ្ពស់កប់ពកមែន តែមិនទាន់មានការស្នើសុំច្បាប់សាងសង់ជាផ្លូវការនៅឡើងទេ”។
តែយ៉ាងណាក៏ដោយ ឯកឧត្តមគួច ចំរើន មិនអាចបញ្ជាក់ពីតម្លៃនៃការវិនិយោគនិងទំហំដីនៃការសាងសង់ ឬអភិវឌ្ឍន៍របស់ក្រុមហ៊ុនថាមានប៉ុន្មានហិកតានោះ តែឯកឧត្តមបញ្ជាក់គឺមានទំហំធំស្ថិតនៅក្នុងក្រុងកំពង់ចាម។
ឯកឧត្តម គួច ចំរើនបញ្ជាក់ទៀតទៀតថា នៅក្នុងគម្រោងនេះដែរ ក្រុមហ៊ុនក៏នឹងសាងសង់ Water Park មួយទៀត តែមិនទាន់បានសម្រេចផ្តល់លិខិតអនុញ្ញាតជាផ្លូវការនៅឡើយទេ តែបានដាក់ជាគោលការឱ្យក្រុមហ៊ុនយកទៅគិតគូឱ្យបានត្រឹមត្រូវ និងល្អិតល្អន់ ដោយផ្តល់ការរចនាឱ្យបានច្បាស់លាស់ពីការសាងសង់ និងគិតពីប្រព័ន្ធសុវត្ថិភាពជូនដល់អ្នកទេសចរណ៍ដែលមកលេងកម្សាន្តនៅទីនេះផងដែរ។
ក្រុមហ៊ុន Yue Tai Group Shanghai បាននិងកំពុងសាងសង់់បុរីជាលើកដំបូងនៅក្នុងទីក្រុងកំពង់ចាម ដោយក្រុមហ៊ុននេះកំពុងសាងសង់ទីក្រុងរណបមួយ នៅក្នុងទីក្រុងនេះ ស្ថិតនៅលើផ្ទៃដីជាង៤០ហិកតា៕