នៅព្រឹកថ្ងៃទី១១ ខែកក្កដា ឆ្នាំ២០១៩ ឯកឧត្ដម ទិន ពន្លក អគ្គលេខាធិការក្រុមប្រឹក្សាជាតិអភិវឌ្ឍន៍ដោយចីរភាព (ក.ជ.អ.ច.) បានទទួលជួបពិភាក្សាជាមួយលោក Tim Hirsch តំណាងលេខាធិការដ្ឋានវេទិកាព័ត៌មានជីវៈចម្រុះសកល (GBIF) ស្តីពីសារប្រយោជន៍នៃការចូលជាសមាជិកនៃវេទិកាGBIF និងជានាយករងផ្នែកជំរុញការចូលរួម និងទំនាក់ទំនងនៃលេខាធិការដ្ឋាន GBIF។
ឯកឧត្តម ទិន ពន្លក បានឱ្យដឹងថា ជំនួបពិភាក្សានេះរៀបចំឡើងក្នុងគោលបំណងដើម្បីផ្តល់ព័ត៌មានដល់ភាគីពាក់ព័ន្ធពីអត្ថប្រយោជន៍របស់GBIF និងពិចារណាអំពីអត្ថប្រយោជន៍និងកាតព្វកិច្ចមុនផ្តល់យោបល់ជូនរាជរដ្ឋាភិបាលកម្ពុជាពិនិត្យ សម្រេចចូលជាសមាជិកនៃGBIF។
ឯកឧត្ដម បានចាត់ទុកកិច្ចប្រជុំនេះមានសារៈសំខាន់ណាស់សម្រាប់បរិបទកម្ពុជាដោយនឹងបង្ហាញពីវិធីសាស្រ្តគ្រប់គ្រង និងចែករំលែកទិន្នន័យជីវៈចម្រុះលក្ខណៈជាសកល ដែលអាចបំពេញបន្ថែមកង្វះខាតនិងជួយជំរុញឱ្យរៀបចំប្រព័ន្ធទិន្នន័យជីវៈចម្រុះជាតិឱ្យត្រូវតាមស្តង់ដារ និងគ្រប់ជ្រុងជ្រោយ។
សូមជម្រាបផងដែរថា វេទិកាព័ត៌មានជីវៈចម្រុះសកល (GBIF) គឺជាយន្តការអន្តរជាតិថ្មីមួយដែលបង្កើតឡើងសំដៅជំរុញឱ្យមានការចែករំលែកទិន្នន័យ និងធានាបានការទទួលព័ត៌មានជីវៈចម្រុះជាសកល។
តាមរយៈកិច្ចប្រជុំនេះ លោក Tim Hirsch តំណាងលេខាធិការដ្ឋានGBIF បានធ្វើបទបង្ហាញលើប្រធានបទសំខាន់ៗរួមមាន៖ ១. សាវតារសង្ខេបនៃGBIF ២. គុណសម្បត្តិនៃការចូលរួមជាសមាជិក GBIF ៣. នីតិវិធីក្នុងការចូលរួមជាសមាជិកGBIF និង ៤. កិច្ចពិភាក្សារួមដើម្បីស្វែងយល់លម្អិតពីGBIF ៕
