នាព្រឹកថ្ងៃអាទិត្យ ៣រោច ខែស្រាពណ៍ ឆ្នាំកុរ ឯកស័ក ព.ស. ២៥៦៣ ត្រូវនឹងថ្ងៃទី១៨ ខែសីហា ឆ្នាំ២០១៩ លោកជំទាវ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្ប: និងជាប្រធានក្រុមការងារថ្នាក់ជាតិចុះជួយ ស្រុកស្វាយទាប ខេត្តស្វាយរៀង បានអញ្ជើញជាអធិបតីក្នុងកម្មវិធីចុះត្រួតពិនិត្យ និងព្យាបាលជំងឺជូនប្រជាពលរដ្ឋ ឃុំគគីសោម ឃុំពពែត ឃុំព្រៃតាអី ឃុំសំបួរ ឃុំត្រពាំងថ្កោល និងឃុំស្វាយរំពារ ស្រុកស្វាយទាប ខេត្តស្វាយរៀង សរុបចំនួន ៨,៧៨៩នាក់ ដែលពិធីនេះប្រព្រឹត្តទៅនៅសាលាបឋមសិក្សាគគីសោម ស្ថិតក្នុងភូមិសង្គម ឃុំគគីសោម ស្រុកស្វាយទាប ខេត្តស្វាយរៀង។ ការងារចុះពិនិត្យ និងព្យាបាលជំងឺជូនប្រជាពលរដ្ឋនេះ គឺជាសកម្មភាពរបស់ក្រុមការងារគ្រូពេទ្យស្មគ្រ័ចិត្តរបស់ ឯកឧត្ដម ហ៊ុន ម៉ានី តំណាងរាស្ត្រមណ្ឌលកំពង់ស្ពឺ និងជាប្រធានសហភាពសហពន្ធ័យុវជនកម្ពុជា។
ក្រុមគ្រូពេទ្យស្មគ្រ័ចិត្តឯកឧត្ដម ហ៊ុន ម៉ានី សុទ្ធសឹងតែជាវេជ្ជបណ្ឌិត មកពីក្នុង និងក្រៅប្រទេសដែលកំពុងបម្រើការនៅមន្ទីរពេទ្យរដ្ឋ និងឯកជនដែលមានបទពិសោធន៍ជាច្រើនឆ្នាំ។