ឈ្មោះចំនួនជាង ៨ពាន់នាក់ ត្រូវបានលុបពីបញ្ជីបោះឆ្នោត ដោយគណៈកម្មាធិការជាតិរៀបចំការបោះឆ្នោត ។ ការលុបឈ្មោះនេះ បានអោយដឹងតាមសេចក្តីប្រកាសថ្ងៃទី៣ ខែមករា ឆ្នាំ២០១៧នេះ ដែលជាថ្ងៃដំបូងនៃការបិទផ្សាយបញ្ជីបោះឆ្នោតនិងបញ្ជីឈ្មោះអ្នកដែលនឹងត្រូវលុបចេញពីបញ្ជីបោះឆ្នោតតាមឃុំសង្កាត់។
សេចក្តីប្រកាសរបស់គជប បានអំពាវនាវឲ្យប្រជាពលរដ្ឋដែលបានចុះឈ្មោះបោះឆ្នោតរួច ទៅពិនិត្យមើលឈ្មោះនិងផ្ទៀងផ្ទាត់ទិន្នន័យរបស់ខ្លួននៅឃុំសង្កាត់ចំនួន ១,៦៣៣ ទូទាំងប្រទេសកម្ពុជា។
សេចក្តីប្រកាសរបស់គជប បានឲ្យដឹងថា ចំនួនឈ្មោះក្នុងបញ្ជីបោះឆ្នោតដំបូងដែលត្រូវបិទផ្សាយសរុប មានចំនួន ៧,៨៦៤,៤២៩នាក់។ ចំនួនឈ្មោះដែលនឹងត្រូវលុបចេញពីបញ្ជីបោះឆ្នោតសរុប ៨,៣៤៦នាក់។ ដោយឡែកឈ្មោះដែលបានលុបចេញរួចហើយ មានចំនួន ២,៧៣៧នាក់ ដោយសារទិន្នន័យនេះ សល់ពីការចុះឈ្មោះសាកល្បង និងការផ្ទេរការិយាល័យក្នុងឃុំសង្កាត់។
ការបិទផ្សាយបញ្ជីបោះឆ្នោតដំបូងនិងបញ្ជីឈ្មោះអ្នកដែលត្រូវលុបចេញពីបញ្ជី បោះឆ្នោតតាមឃុំសង្កាត់នីមួយៗ ក្រៅពីមានការបិទផ្សាយនៅតាមសាលាឃុំសង្កាត់ទាំង១,៦៣៣ ទូទាំងប្រទេសក៏មានបង្ហោះនៅលើគេហទំព័ររបស់គជប ផងដែរ។ គជបបានអោយដឹងទៀតថា ចាប់ពីថ្ងៃទី៤ ដល់ថ្ងៃទី១៤ ខែមករា ឆ្នាំ២០១៧ គណៈកម្មាធិការជាតិរៀបចំការបោះឆ្នោត នឹងទុកពេលអោយប្រជាពលរដ្ឋប្តឹងជំទាស់ ទៅលើបញ្ហាមានការខុសឈ្មោះ ខុសអក្ខរាវិរុទ្ធណាមួយនៅក្នុងបញ្ជីបោះឆ្នោតនោះ។ ក្នុងអំឡុងពេល១០ថ្ងៃ សម្រាប់ការប្តឹងតវ៉ា នឹងប្តឹងទាស់នោះ ក្រុមប្រឹក្សាឃុំ-សង្កាត់និងភ្នាក់ងារ គ.ជ.ប នឹងដោះស្រាយជូនពលរដ្ឋភ្លាមៗ។
ការប្តឹងតវ៉ានឹងប្តឹងជំទាស់នោះ ធ្វើឡើងជាដំណាក់កាល គឺដំបូងប្រជាពលរដ្ឋទៅក្រុមប្រឹក្សាឃុំ សង្កាត់ ជាមុនសិន តែបើក្នុងករណីប្រជាពលរដ្ឋមិនសុខចិត្ត ត្រូវប្តឹងនៅទីស្តីការនៃគណៈកម្មាធិការជាតិ រៀបចំការបោះឆ្នោតនៅរាជធានីភ្នំពេញ ឬអាចបន្តប្តឹងទៅក្រុមប្រឹក្សារដ្ឋធម្មនុញ្ញបន្តទៀតបាន។