កំពង់ចាម: ឯកឧត្យម អ៊ុន ចាន់ដា អភិបាល នៃគណអភិបាលខេត្ត អមដំណើរដោយអភិបាលរងខេត្ត មន្ទីរអង្គភាពជំនាញពាក់ព័ន្ធជុំវិញខេត្ត រួមនឹងអាជ្ញាធរមូលដ្ឋាន នៅវេលាថ្ងៃត្រង់ ថ្ងៃទី៥ កញ្ញា ២០១៩នេះ បានអញ្ជើញចុះពិនិត្យការដាក់ម៉ាសុីនត្រៀមអន្តរាគមន៍បូមទឹក ដេីម្បីបញ្ចៀសជំនន់លិចចូលក្នុងក្រុង ស្ថិតនៅក្នុងសង្កាត់បឹងកុក ក្រុងកំពង់ចាម ខណៈដែលទឹកទន្លេមេគង្គនៅតែបន្តហក់ឡើង។ បន្ទាប់មកឯកឧត្តមអភិបាលខេត្ដ ក៏បានដឹកនាំក្រុមការងារបន្តចុះពិនិត្យការបាក់ស្រុតដីច្រាំងទន្លេនៅតាមបណ្ដាលឃុំមួយចំនួននៅក្នុងស្រុកកងមាស ព្រមទាំងបានឧបត្ថម្ភនូវថវិកា និងសម្ភារៈមួយចំនួន ជូនដល់បងប្អូនប្រជាពលរដ្ឋ ដែលត្រូវរុះរើផ្ទះបន្ទាន់គេចចេញពីការបាក់ស្រុតចូលទៅក្នុងទន្លេផងដែរ។
យោងតាមរបាយការណ៍របស់ លោក មឿន ផា អភិបាលស្រុកកងមាស បានបញ្ជាក់ថា នៅក្នុងរដូវទឹកឡើងនាឆ្នាំ២០១៩នេះ ស្ថានភាពទឹកទន្លេមេគង្គ បានហក់ឡើងជាកំហុកនៅដើមខែកញ្ញានេះ ម៉្យាងទៀតដោយភូមិសាស្ត្រស្រុកកងមាស នៅស្របតាមបណ្តាយដងទន្លេមេគង្គ ងាយនឹងរងគ្រោះដោយទឹកជំនន់ និងការបាក់ច្រាំងទន្លេ។ ជាក់ស្តែងនៅថ្ងៃទី០៤ ខែកញ្ញា នេះ នៅក្នុងភូមិសាស្ត្រស្រុកកងមាស មានគ្រោះធម្មជាតិដោយសារ ស្រុតច្រាំងទន្លេចំនួន០៣ឃុំ និងរុះរើផ្ទះប្រជាពលរដ្ឋជាបន្តបន្ទាប់ចំនួន០៤គ្រួសារផងដែរ។ ក្នុងនោះឃុំរកាអារ ភូមិជ្រោយក្របៅទី២ ស្រុតច្រាំងទន្លេ បណ្តោយ៣៥០ម៉ែត្រ ទទឹង១០ម៉ែត្រ។ ឃុំអង្គរបាន ភូមិអង្គរបានទី៨ ស្រុតច្រាំងទន្លេ បណ្តោយ៨០ម៉ែត្រ ទទឹង០៥ម៉ែត្រ។ និងឃុំស្តៅ ភូមិល្វាលើ ស្រុតច្រាំងទន្លេ បណ្តោយ១០០ម៉ែត្រ ទទឹង៤០ម៉ែត្រ ក្នុងនោះត្រូវរុះរើផ្ទះចំនួន០៤គ្រួសារ ១-ឈ្មោះ ចាប ឈើយ ប្រក់ក្បឿង ទំហ៩x៧ម៉ែត្រ ។
២-ឈ្មោះ ឡា ពិសិដ្ឋ ប្រក់សង្ក័សី ទំហំ៧x៥ម៉ែត្រ ។
៣-ឈ្មោះ យ៉ង់ គឹមហ័ង ប្រក់ក្បឿង ទំហំ៧x៥ម៉ែត្រ ។
និងទី៤-ឈ្មោះ ឃ្លោក សុខឃីម ប្រក់សង្ក័សី ទំហំ៥x៦ម៉ែត្រ ។ តែមិនបណ្តាលឲ្យ មានគ្រោះថ្នាក់ដល់ប្រជាពលរដ្ឋណាម្នាក់ឡើយ ។
ជាមួយគ្នានោះឯកឧត្តមអភិបាលខេត្ត ក៏បានឧបត្ថម្ភនូវថវិកា និងសម្ភារះមួយចំនួន ព្រមទាំងបានធ្វើការណែនាំដល់មន្ត្រីអាជ្ញាធរពាក់ព័ន្ធ ត្រូវជួយតាមដានស្ថានភាព នៃការបាក់ច្រាំងទន្លេនេះជាប្រចាំ ដើម្បីមានវិធានការជួយសង្រ្គោះទាន់ពេលវេលាផងដែរ ៕