ភរិយាអភិបាលខេត្តក្រចេះ យកអំណោយជូនជនរងគ្រោះដោយទឹកកជំននន់ នៅមូលដ្ឋានស្រុកឆ្លូង


(ក្រចេះ)៖ លោកជំទាវ ហឹង ណារី វ៉ា ថន ភរិយាអភិបាលខេត្តក្រចេះ ឯកឧត្តម វ៉ា ថន នៅថ្ងៃទី០៩ ខែកញ្ញា ឆ្នាំ២០១៩នេះ ដឹកនាំយុវជខេត្ត/ស្រុក ចុះសួរសុខទុក្ខប្រជាពលរដ្ឋ និងកុមារពិការ ដែលរងគ្រោះដោយទឹកជំនន់ ជួបការខ្វះខាតចំនួន ០៧គ្រួសារ នៅភូមិថ្មក្រោម ឃុំឆ្លូង និងភូមិហាន់ជ័យទី១ ឃុំហាន់ជ័យ ស្រុកឆ្លុង ដោយឧបត្ថម្ភជាគ្រឿងឧបភោគបរិភោគ និងជូនថវិកាមួយចំនួន។

ក្នុងឱកាសនោះលោកជំទាវ ហឹង ណារី វ៉ា ថន ក៏បានណែនាំដល់ប្រជាពលរដ្ឋ ត្រូវថែរក្សាសុខភាព រស់នៅស្អាត ផឹកទឹកដាំពុះ បរិភោគចំណីអាហារមានអនាម័យ ជាពិសេសត្រូវប្រុងប្រយ័ត្នកូន ចៅតូចៗ កុំឱ្យលេងទឹកខ្លាចលង់ ខ្លាចពស់ក្អែបទិច។

សូមបញ្ជាក់ថា រដ្ឋបាលខេត្តក្រចេះ បានសម្រេចផ្អាកចរាចរណ៍បណ្តោះអាសន្ន ចំពោះយានយន្តគ្រប់ប្រភេទ ដោយមិនឱ្យឆ្លងកាត់កំណាត់ផ្លូវជាតិលេខ៧៣ ពីស្រុកឆ្លូង ទៅទីរួមខេត្ត្តក្រចេះឡើយ ដោយសារកម្ពស់ទឹកទន្លេមេគង្គ ហក់ឡើងជន់លិចផុតកម្រិតកំពស់ប្រុងប្រយត្ន័ និងបានជន់លិចកំណាត់ផ្លូវជាតិលេខ​៧៣​ ចន្លោះគីឡូម៉ែត្រ៧៥+០០០​ ដល់គីឡូម៉ែត្រ៨៦+០០០​ ក្នុងភូមិសាស្រ្តស្រុកចិត្របុរី​ ខេត្តក្រចេះ​។

សេចក្តីប្រកាសព័ត៌មានរបស់អភិបាលខេត្តក្រចេះ លោក វ៉ា ថន បានបញ្ជាក់ថា ការផ្អាកនេះដើម្បីបញ្ចៀសគ្រោះថ្នាក់ ដែលអាចកើតឡើងជាយថាហេតុ របស់បងប្អូនប្រជាពលរដ្ឋ និងការពារតួផ្លូវកុំឲ្យរងការខូចខាតធ្ងន់ធ្ងរ។ រដ្ឋបាលខេត្តក្រចេះបញ្ជាក់ថា ការផ្អាកចរាចរណ៍បណ្តោះអសន្ននេះ ត្រូវធ្វើរហូតដល់ពេលទឹកស្រក មានស្ថានភាពល្អប្រសើរឡើងវិញ៕