នៅរសៀលថ្ងៃពុធ ១១កើត ខែអស្សុជ ឆ្នាំកុរ ឯកស័ក ព.ស ២៥៦៣ ត្រូវនឹងថ្ងៃទី៩ ខែតុលា ឆ្នាំ២០១៩ វេលាម៉ោង ១៥:០០នាទី លោក ង៉ាន់ ភិរុណ អភិបាលរងខេត្ត តំណាងឯកឧត្តម ទៀ សីហា អភិបាលខេត្តសៀមរាប បានដឹកនាំកិច្ចប្រជុំពិនិត្យរបាយការណ៍ពាក់ព័ន្ធទៅនឹងការងារគ្រប់គ្រងគ្រោះមហន្តរាយតាមបណ្ដាក្រុង ស្រុកទាំង១២ក្នុងខេត្ត ដោយមានការចូលរួមពី លោក លោកស្រី ប្រធាន អនុប្រធានមន្ទីរ-អង្គភាពនានា អភិបាល អភិបាលរង ក្រុងស្រុក និងអ្នកពាក់ព័ន្ធនានា។
កិច្ចប្រជុំនេះធ្វើឡើងដើម្បីបូកសរុបរបាយការណ៍ពីអាជ្ញាធរមូលដ្ឋាន និងអង្គភាពមន្ទីរនូវផលប៉ះពាល់ ដោយសារគ្រោះរាំងស្ងួត និងផលប៉ះពាល់ដោយគ្រោះទឹកជំនន់ទឹកភ្លៀងនាពេលកន្លងមក ដែលនាំឱ្យខូចខាតហេដ្ឋារចនាសម្ព័ន្ឋ ខូចខាតផលដំណាំ ងាប់ និងលិចលង់សន្ទូង របស់បងប្ងូនប្រជាពលរដ្ឋនៅតាមបណ្តាភូមិសាស្ត្រ ក្រុង-ស្រុក នៃខេត្តសៀមរាបចាប់ពីអំឡុងខែសីហា រហូតដល់ខែកញ្ញា ឆ្នាំ២០១៩ ដែលក្នុងរយៈពេលពីខែចុងក្រោយនេះស្រុកមួយចំនួននៅខេត្តសៀមរាប មានករណីគ្រោះមហន្តរាយកើតឡើងបន្តបន្ទាប់ដោយសារគ្រោះធម្មជាតិ ដូចជា៖ ស្រុកក្រឡាញ់ ស្រុកអង្គរជុំ ស្រុកវ៉ាវិន ស្រុកជីក្រែង ស្រុកស្វាយលើ ស្រុកស្រីស្នំ ស្រុកពួក ស្រុកប្រាសាទបាគង ស្រុកអង្គរធំ ស្រុកសូទ្រនិគម ស្រុកបន្ទាយស្រី និងក្រុងសៀមរាប បានទទួលរងនូវផលប៉ះពាល់ពីគ្រោះរាំងស្ងួត គ្រោះទឹកជំនន់ ឧប្បទ្ទេវហេតុផ្សេងៗ ។
លោក ង៉ាន់ ភិរុណ អភិបាលរងខេត្ត បានមានប្រសាសន៍ស្នើសុំឲ្យអាជ្ញាធរគ្រប់លំដាប់ថ្នាក់ត្រូវធ្វើរបាយការណ៍ផ្តល់មកលេខាធិការដ្ឋានគ្រប់គ្រងគ្រោះមហន្តរាយខេត្តឱ្យបានទៀងទាត់ និងយកចិត្តទុកដាក់ខ្ពស់លើការងារនេះ ដើម្បីក្រុមការងារលេខាធិការដ្ឋានធ្វើរបាយការណ៍រាយការណ៍ជូនទៅគណៈកម្មាធិការជាតិគ្រប់គ្រងគ្រោះមហន្តរាយ បានជ្រាប និងដើម្បីមានវិធានការដោះស្រាយ និងឆ្លើយតបបានទាន់ពេលវេលាចំពោះសេចក្តីត្រូវការទៅតាមសំណូមពររបស់បងប្អូនប្រជាពលរដ្ឋដែលរងផលប៉ះពាល់ដោយគ្រោះមហន្តរាយផ្សេងៗ។
