(ហុងគ្រី)៖ កាលពីរសៀលថ្ងៃទី១៤ ខែតុលា ឆ្នាំ២០១៩ នៅពេលអញ្ជើញមកដល់សណ្ឋាគារស្នាក់នៅ ក្នុងប្រទេសហុងគ្រី សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានអញ្ជើញផ្តល់កិត្តិយស ជួបជុំសំណេះសំណាលជាមួយកូនក្មួយនិស្សិតខ្មែរ ដែលកំពុងសិក្សានៅក្នុងប្រទេសហុងគ្រី (Hungary) ជាច្រើនរូប។ សម្តេចតេជោ សប្បាយរីករាយ ដែលបានយកពេលវេលាដ៏មានតម្លៃ មកជួបកូនក្មួយនិស្សិតនៅទីនេះ។ សម្តេចក៏បានប្រកាសថា បើគណបក្សប្រជាជនកម្ពុជា នៅតែឈ្នះឆ្នោត ហើយសម្តេចតេជោ ហ៊ុន សែន នៅតែបន្តដឹកនាំប្រទេសជាតិ គឺ១)រាជរដ្ឋាភិបាលមិនយកពន្ធលើដីស្រែចំការរបស់បងប្អូនប្រជាកសិករឡើយ។ ២)បៀវត្សអប្បបរិមា ទោះបីឡើងដល់ណា ក៏អត់ជាប់ពន្ធដែរ។
ជាមួយគ្នានេះ សម្តេចតេជោនាយករដ្ឋមន្ត្រី បានកោតសរសើរដល់ក្មួយៗ ដែលបានមកបន្តការសិក្សានៅក្នុងប្រទេស ដែលមានការរីកចម្រើនដូចជាប្រទេសហុងគ្រីនេះ ជាដើម។ តាមការសាកសួរពី សម្តេចតេជោ គឺមាននិស្សិតយើង មកពីខេត្តមួយចំនួន ដូចជា ស្វាយរៀង, បាត់ដំបង, កណ្តាល, រតនគិរី, បន្ទាយមានជ័យ, ភ្នំពេញ និងតាកែវ។ និស្សិតមួយចំនួន ក្រោយពីចប់ការសិក្សាហើយ ក៏មានការងារធ្វើជាមួយក្រុមហ៊ុនផ្សេងៗ នៅទីនេះតែម្តង។ ភាគច្រើននិស្សិត ដែលមករៀននៅទីនេះ គឺមានកម្រិតបរិញ្ញាប័ត្រ បរិញ្ញាបត្រជាន់ខ្ពស់ និងថ្នាក់បណ្ឌិត។
សម្តេចតេជោ បានគាំទ្រ និងលើកទឹកចិត្តដល់និស្សិតខ្មែរ អោយខិតខំរៀនសូត្រ គោរពច្បាប់ប្រទេសគេ ហើយបន្តសិក្សាអោយបានជ្រៅជ្រះ ប្រសិនបើជួបការលំបាកលើបញ្ហាអ្វីមួយ ក្នុងពេលសិក្សា គឺរាជរដ្ឋាភិបាល នឹងយកចិត្តទុកដាក់ដោះស្រាយជូនកូនក្មួយនិស្សិតគ្រប់ៗគ្នា ដូចជាចំណុចមួយ ដែលនិស្សិតស្រីម្នាក់ បានលើកឡើង គឺប្រសិនបើសិក្សានៅក្រៅប្រទេសហើយអស់បួកហើយ ហើយក្នុងកិច្ចសន្យា បើរៀនចប់ហើយ ត្រូវតែវិលត្រឡប់ទៅកាន់ប្រទេសវិញ។
សម្តេចតេជោ នឹងដោះស្រាយជូនមិនអោយកូនក្មួយនិស្សិតពិបាកទេ ក្នុងការសិក្សា បើកូនក្មួយត្រូវបន្តការសិក្សាយកថ្នាក់ខ្ពស់ថែមទៀត គឺមិនចាំបាច់វិលទៅប្រទេសវិញឡើយ គឺអាចនៅបន្តការសិក្សាបាន បើមានអាហារូបករណ៍សិក្សាបន្ត។
សម្តេចតេជោនាយករដ្ឋមន្ត្រី បានជម្រាបកូនក្មួយអំពីស្ថិរភាពនយោបាយ សង្គម សេដ្ឋកិច្ចដែលកំពុងជំរុញដល់ការរីកលូតលាស់នៃប្រទេសជាតិ។ ទន្ទឹមនឹងនេះ ចំណូលពន្ធ ក៏មានការកើនឡើង គួរជាទីមោទកផងដែរ។
ឆ្លៀតក្នុងឱកាសនេះដែរ សម្តេចតេជោ ហ៊ុន សែន បានជម្រាបប្រាប់កូនក្មួយ ក៏ដូចជាមន្ត្រីរាជការអោយបានជ្រាបថា ចំពោះប្រាក់បៀរវត្សន៍អប្បបរិមា ទោះបីឡើងដល់ណា ក៏រដ្ឋាភិបាលអត់យកពន្ធដែរ ដូចជាប្រាក់ខែគ្រូបង្រៀន ដែលឡើងពី ១លាន ២សែន ទៅ ១លាន ៣សែន គឺអត់យកពន្ធទេ។ ក្រសួងសេដ្ឋកិច្ច នឹងប្រកាសក្នុងច្បាប់ហិរញ្ញវត្ថុជាផ្លូវការ។
សម្តេចតេជោ បានលើកបញ្ជាក់សាជាថ្មី ជម្រាបដល់កូនក្មួយក៏ដូចជាពលរដ្ឋ ជាពិសេសកសិករអោយបានជ្រាបថា ល្គឹកណា គណបក្សប្រជាជនកម្ពុជា នៅតែឈ្នះឆ្នោត ហើយ សម្តេចតេជោ នៅតែបន្តដឹកនាំប្រទេសជាតិ គឺ ១)រាជរដ្ឋាភិបាលមិនយកពន្ធលើដីស្រែចំការរបស់បងប្អូនប្រជាកសិករឡើយ។ ២)បៀវត្សអប្បបរិមា ទោះបីឡើងដល់ណាក៏អត់ជាប់ពន្ធដែរ។
នៅក្នុងឱកាសនៃការសំណេះសំណាលនេះ សម្តេចតេជោ ហ៊ុន សែន បានឧបត្ថម្ភថវិកាលើកទឹកចិត្តដល់ក្មួយៗ ដែលបានអាហារូបករណ៍នៅហុងគ្រី អោយខិតខំសិក្សារៀនសូត្រ ធ្វើជានិស្សិតល្អ កូនល្អ ជាពលរដ្ឋល្អ និងជាធនធានល្អរបស់ប្រទេសជាតិ។ សម្តេចតេជោ បានជូនពរអោយក្មួយៗជោគជ័យក្នុងជីវិតគ្រប់ៗគ្នា។
សូមរម្លឹកថា សម្តេចតេជោ ហ៊ុន សែន បានអញ្ជើញបំពេញទស្សនកិច្ចផ្លូវការនៅទឹកដីអឺរ៉ុប ចាប់ពីថ្ងៃទី១៣ ដល់ថ្ងៃទី១៧ ខែតុលា ឆ្នាំ២០១៩ ដោយចាប់ផ្តើមមុនគេនៅប្រទេសឆេក ហុងគ្រី និងចុងក្រោយ នៅប្រទេសប៊ុលហ្គារី៕