រាជធានីភ្នំពេញ៖ មជ្ឈមណ្ឌលបណ្ដុះបណ្ដាលគ្រូ ស្ដីពីការអប់រំស្ទែម ត្រូវបានដាក់សម្ពោធដាក់ឱ្យប្រើប្រាស់ជាផ្លូវការ ដើម្បីផ្ដល់ឱកាសសិស្សអាចសិក្សាតាមរបៀប STEM និងរៀនតាមបណ្ដាញអ៊ីនធឺណិត ជាមួយគ្រូបង្រៀនល្បីៗ ក្នុង Smart phone ដែលសិស្សអាចសិក្សាបានគ្រប់ពេល គ្រប់ទីកន្លែងជាចំណែកមួយធ្វើឱ្យសម្រេចបានធនធានមនុស្សមានចំណេះដឹង និងមានជំនាញឆ្លើយតបទៅនឹងមុខរបរនាសតវត្សរ៍ទិ២១។
កម្មវិធីនេះប្រព្រឹត្តទៅក្រោមអធិបតីភាព ឯកឧត្ដម អ៊ឹម កុច រដ្ឋលេខាធិការក្រសួងអប់រំ យុវជន និងកីឡា។ ក្នុងឱកាសនោះ ឯកឧត្ដម បានថ្លែងអំណរគុណចំពោះអង្គការ គណៈគ្រប់គ្រងវិទ្យាស្ថានបច្ចេកវិទ្យាកម្ពុជា នាយកដ្ឋានអភិវឌ្ឍកម្មវិធីសិក្សា សាលាបង្រៀនជំនាន់ថ្មី មន្ទីរអប់រំ យុវជន និងកីឡារាជធានី វិទ្យាស្ថានជាតិអប់រំ ដែលបានសហការយ៉ាងជិតស្និទ្ធជាមួយភាគីកូរ៉េ ក្នុងការសម្រេចឱ្យលេចចេញជាមជ្ឈមណ្ឌលមួយនេះឡើង ដើម្បីឈានទៅបង្កើតការអប់រំ STEM និងបច្ចេកវិទ្យា ICT។
មជ្ឈមណ្ឌលបណ្ដុះបណ្ដាលគ្រូ ស្ដីពីការអប់រំស្ទែម ជាផ្នែកមួយនៃរបស់ក្រសួងអប់រំ យុវជន និងកីឡា លើវិធីសាស្ត្រគ្រប់គ្រង វិធីបង្រៀន ដោយធ្វើយ៉ាងណាឱ្យសិស្សមានសមត្ថភាពខ្ពស់ទាំងចំណេះដឹង និងជំនាញ តាមរយៈការអប់រំសិស្សឱ្យសិក្សាទាំងក្នុងថ្នាក់ផង និងរៀនអនុវត្តក្រៅសាលាផងដែរ៕
៣១ តុលា ២០១៩ | វិទ្យាស្ថានបច្ចេកវិទ្យាកម្ពុជា
