ផ្លូវ​បេតុង​ ចំនួន​៣ខ្សែ​ និងបណ្ដាញលូបង្ហូរទឹក​ ក្នុងក្រុងសៀមរាប​នឹងបេីកការដ្ឋានសាងសង់នៅថ្ងៃទី២៣​ ខែវិច្ឆិកា​ ឆ្នាំ​២០១៩


ថ្ងៃសុក្រ​ ៤រោច​ ខែកត្ដិក​ ឆ្នាំកុរ​ ឯកស័ក​ ព.ស​២៥៦៣​ ត្រូវនឹងថ្ងៃទី​១៥ ខែវិច្ឆិកា​ ឆ្នាំ​២០១៩​ លោក​ សុខ​ ថុល​ នាយករដ្ឋបាលសាលាខេត្ត​ បានដឹកនាំក្រុម​ការងារ​ចម្រុះ​រដ្ឋបាលខេត្តចុះពិ​និត្យ​ទីតាំង​បេីកការដ្ឋានសាងសង់ផ្លូវ និងបណ្ដាញលូទឹកចំនួន​ ៣ខ្សែ​ ក្នុងចំណោមគម្រោងផ្លូវ​ និងបណ្ដាញលូទឹកចំនួន​ ១៧ខ្សែ​ដែលត្រូវសាងសង់​ចាក់បេតុង​ និងដាក់លូបង្ហូរទឹកចេញពីក្រុង​ និងដេីម្បីបញ្ជៀសការកកស្ទះចរាចរណ៍ក្នុងក្រុងសៀមរាប​ ការដ្ឋានសាងសង់​ផ្លូវ​ចំនួន​ ៣ខ្សែ​នេះនឹងចាប់បេីកនៅថ្ងៃទី២៣​ ខែវិច្ឆិកា​ ឆ្នាំ​២០១៩​ ខាងមុខ​ ។

ដោយប្រព័ន្ធ​ហេដ្ឋារចនាសម្ព័ន្ធ​ គឺវិស័យអាទិភាពមួយ​ ក្នុងចំណោមវិស័យអាទិភាពធំៗ​ និងជាសរសៃឈាមសេដ្ឋកិច្ចដ៏ចម្បង​របស់ជាតិ ដេីម្បីការងារអភិវឌ្ឍន៍​ឲ្យមានការរីកចម្រេីនលេីគ្រប់វិស័យ​ ជាពិសេសដេីម្បីធ្វេីឲ្យរាជធានី​ ខេត្ត​ នីមួយៗតភ្ជាប់បណ្ដាញ​ហេដ្ឋារចនាសម្ព័ន្ធ​កាន់តែប្រសេីរឡេីង​ ក្នុងនោះ​ដេីម្បីរៀបចំក្រុងសៀមរាបឲ្យមានសោភ័ណ្ឌភាព​ សណ្ដាប់ធ្នាប់​ របៀបរៀបរយ​ បញ្ជៀសការកកស្ទះចរាចរណ៍​ និងចៀសផុតពីការកកស្ទះប្រព័ន្ធលូរ​បង្ហូរទឹក​ ទឹកភ្លៀង​ ទឹកជំនន់​ និងដេីម្បីបង្ហូរទឹកចេញពីក្រុង​ និងធ្វេីឲ្យទីក្រុងស្រស់ស្អាត​សមជាទីក្រុងវៃឆ្លាត​ (Siem Reap Smart City)​ស្រមតាមយុទ្ធសាស្ដ្រទីក្រុងវៃឆ្លាតកម្ពុជា​ ។

ក្នុងឆ្នាំ​២០១៩​ រដ្ឋបាលខេត្ត​មានគម្រោងសាងសង់​ និងជួសជុលហេដ្ឋារចនាសម្ព័ន្ធចំនួន​ ១៧ខ្សែ​ ហេីយគម្រោងនេះទទួលម៉ៅការសាងសង់​ និងជួសជុលដោយ​ កម្លាំងកងវិស្វកម្ម​ ឯកឧត្តម​ សៀង​ ណាំ​ តំណាងរាស្ដ្រ​មណ្ឌលសៀមរាប​ ។

សូមបញ្ជាក់​ ផ្លូវ​ និងបណ្ដាញលូទឹកចំនួន​ ០៣ខ្សែ​ ក្នុងចំណោមផ្លូវ​ និងបណ្ដាញលូចំនួន​ ១៧ខ្សែ​ ដែលត្រូវសាងសង់​ និងជួសជុល​ក្នុងឆ្នាំ២០១៩​នេះ​ រួមមាន​៖
១-​សាងសង់​ផ្លូវ​បេតុង​ និងដាក់លូបណ្ដោយផ្លូវមុខកាត់​ ០១ម៉ែត្រ​ ភូមិតាវៀន​ សង្កាត់​សាលាកំរេីក​​ (ពីផ្លូវ​ក្រោយផ្សារលេី​ កាត់ផ្ទះតាអុច​ ដល់ផ្លូវវាងក្រុង)​ ប្រវែង​ ១២៥០ម៉ែត្រ​ ទទឹង​ ១០ម៉ែត្រ​។
២-សាងសង់​ផ្លូវ​បេតុង​ និងដាក់លូបណ្ដោយផ្លូវមុខកាត់​ ០១ម៉ែត្រ​ ភូមិចុងកៅស៊ូ​ សង្កាត់​ស្លក្រាម​ (ពីផ្លូវ​ជាតិលេខ​ ៦​ ចំណុច​ភ្លេីងស្តុប​ ស្មាយលីង​ ដល់ផ្លូវផ្ទះ​តាអុច​)​ ប្រវែង​ ៣៥០ម៉ែត្រ​ ទទឹង​ ០៨ម៉ែត្រ​។
៣-សាងសង់​ផ្លូវ​បេតុង​ ភូមិតាវៀន​ សង្កាត់​សាលាកំរេីក​​ (ពីផ្លូវផ្ទះតាអុច​ កាត់តាមទីស្នាក់ការភូមិតាវៀន​) ប្រវែង​ ៤៥០ម៉ែត្រ​ ទទឹង​០៧ម៉ែត្រ​៕