នគរបាលខេត្តកណ្តាលតាមភូមិឃុំ ត្រូវគេឃើញ បានធ្វើវេទិកាសាធារណៈនៅថ្ងៃទី ១៥ មករានេះ និងបានផ្សព្វផ្សាយពីចំណុចទាំង៩ របស់ភូមិឃុំមានសុវត្ថិភាព ។ ការផ្សព្វផ្សាយនេះ ត្រូវមន្ត្រីរៀបចំបាននិយាយថា គឺដើម្បីពង្រឹងទប់ស្កាត់ករណីប្លន់ប្រដាប់អាវុធ ដែលកើតមានកន្លងមកទាំងក្នុងរាជធានី និងតាមខេត្ត ជាបន្តបន្ទាប់នោះ ។
សូមបញ្ជាក់ថា ភូមិឃុំដែលមានសុវត្ថិភាព គឺមានលក្ខណៈសម្បត្តិ ៩យ៉ាង គឺគ្មានសកម្មភាពលួច ឆក់ ប្លន់គ្រប់ប្រភេទ… គ្មានការដាំដុះ ការផលិត ការចរាចរ ការជួញដូរ ការចែកចាយ និងការប្រើប្រាស់គ្រឿងញៀនខុសច្បាប់… គ្មានអំពើអានាចារ្យ ការជួញដូរស្ត្រី និងកុមារ និងអំពើហិង្សាក្នុងគ្រួសារ… គ្មានគ្រោះថ្នាក់ចរាចរណ៍… គ្មានគ្រោះថ្នាក់ដោយសារយុទ្ធភ័ណ្ឌមិនទាន់ផ្ទុះ… មានវិធានការទប់ស្កាត់ គ្រប់គ្រង និងឆ្លើយតបចំពោះគ្រោះមហន្តរាយប្រកបដោយប្រសិទ្ធិភាព និងគ្មានការត្រួតពិនិត្យដាក់កុងត្រូលខុសច្បាប់ ។
ការធ្វើវេទិកាសាធារណៈ ដោយកម្លាំងនគរបាលតាមមូលដ្ឋាន ក្នុងខេត្តកណ្តាល នៅថ្ងៃទី ១៥ ខែមករានេះ ត្រូវគេឃើញថា គឺមានការចូលរួមពីប្រជាពលរដ្ឋ… និងមានលើកឡើងអំពីបញ្ហាប្រឈម និងដោះស្រាយជូនប្រជាពលរដ្ឋផងដែរ… ចំណែកបញ្ហាខ្លះទៀតដែលមិនអាចឆ្លើយតបបានភ្លាមៗ ត្រូវបានរាយការណ៍ជូនថ្នាក់លើដើម្បីដោះស្រាយ ។
ក្នុងវេទិការសាធារណៈតាមមូលដ្ឋាននេះទៀត សមត្ថកិច្ចខេត្តកណ្តាលបានស្នើសុំកិច្ចសហការ ពីប្រជាពលរដ្ឋ ដើម្បីរាយការណ៍រាល់ការសង្ស័យពីភាពមិនប្រក្រីណាមួយ កើតក្នុងមូលដ្ឋាន ជូនសមត្ថកិច្ចអោយបានដឹងផងដែរ ។
