បាត់ដំបង: នៅសាលប្រជុំសាលាខេត្តបាត់ដំបង កាលពីរសៀលថ្ងៃទី២៤ ខែធ្នូ ឆ្នាំ២០១៩ អាជ្ញាធរខេត្តបាត់ដំបងបានជួបពិភាក្សាជាមួយនិងក្រុមហ៊ុនរបស់ចិនមួយ ក្នុងគោលបំណងវិនិយោគកែច្នៃសំរាមឱ្យក្លាយជាថាមពលសម្រាប់ប្រើប្រាស់ក្នុងខេត្តបាត់ដំបង ដើម្បីចូលរួមលើកកម្ពស់បរិស្ថាន និងសុខមាលភាពប្រជាពលរដ្ឋក្នុងនិងក្រៅទីប្រជុំជន។
លោក Zhou Yuhui ប្រធាក្រុមហ៊ុន CITI CPE បានឱ្យដឹងថា ក្រោយពីធ្វើការការសិក្សាលំអិតលើគម្រោងដោះស្រាយបញ្ហាសំរាមនៅទូទាំងខេត្តបានបញ្ចប់ ក្រុមហ៊ុនរបស់លោកត្រូវការបរិមាណកាកសំណល់សំរាមប្រមាណ៦០០តោនក្នុងមួយថ្ងៃ ដើម្បីបំប្លែងជាចរន្តថាមពលកាត់បន្ថយការប៉ះពាល់ដល់បរិស្ថាន និងលើកកម្ពស់សុខភាព អនាម័យរបស់ប្រជាពលរដ្ឋនៅក្នុងទូទាំងខេត្តបាត់ដំបងទាំងមូល។
លោកបានបន្តថា នៅក្នុងការដោះស្រាយវិនិយោគកែច្នៃសំរាមនេះ ក្រុមហ៊ុនគ្រោងនឹងបែងចែកកាកសំណល់ជាដំណាក់កាលៗ មានការរៀបចំទុកដាក់សំរាម ការដឹកជញ្ជូននិងការកែច្នៃសំរាមគ្រប់ប្រភេទបំប្លែងឱ្យជាថាមពលអគ្គីសនី។ ចំណែកកាកសំណល់ប្លាស្ទិច ឬលោហៈធាតុផលិតកែច្នៃទៅជាសម្ភារៈប្រើប្រាស់ផ្សេងៗវិញ។
លោកប្រធានក្រុមដឹកនាំក្រុមហ៊ុន CITI CPE បានឲ្យដឹងបន្តថា លោករំពឹងយ៉ាងមុតមាំថាគម្រោងខាងលើនឹងទទួលបានជោគជ័យ ព្រោះជំហររបស់ក្រុមហ៊ុនមានគោលដៅចង់ឱ្យការវិនិយោគជាលក្ខណៈឯកជនមួយនេះ វិវឌ្ឍន៍ខ្លួនក្នុងទំហំធំផ្សាភ្ជាប់គ្នាក្នុងកម្រិតរាជរដ្ឋាភិបាលតែម្តង។
ដោយឡែកភាគីអាជ្ញាធរខេត្តបាត់ដំបងលោក ងួន រតនៈ អភិបាលខេត្តបានបញ្ជាក់ថា បើទោះបីគម្រោងគ្រប់គ្រងកាកសំណល់សំរាមនេះ មានប្រទេសមួយចំនួនឈានទៅមុនក៏ដោយ ប៉ុន្តែសម្រាប់ខេត្តបាត់ដំបងវាជាគម្រោងលើកដំបូង ហើយមានសារៈសំខាន់បំផុតសម្រាប់សម្រួលដល់ការរស់នៅរបស់ប្រជាពលរដ្ឋពិសេសលើវិស័យទេសចរណ៍ និងបរិស្ថានសង្គម ដោយសារការគ្រប់គ្រងកែច្នៃសំរាមបច្ចុប្បន្ននៅក្នុងខេត្តបាត់ដំបងនៅមានកម្រិតនៅឡើយ ចាំបាច់មានការធានាពីគម្រោងដៃគូវិនិយោគ។
លោកអភិបាលខេត្តបានបន្តថា ក្នុងនាមថ្នាក់ដឹកនាំរដ្ឋបាលខេត្តលោក ងួន រតនៈ បានត្រៀមខ្លួនជាស្រេច ដើម្បីបង្កលក្ខណៈសម្រួលដល់ក្រុមហ៊ុន CITI CPE សិក្សាស្វែងយល់នៅចំពោះមុខ រួចវាយតម្លៃអនុវត្តន៍គម្រោងគ្រប់គ្រងកាកសំណល់សំរាមនេះ ឲ្យដំណើការឡើងលឿនបំផុត។
បច្ចុប្បន្នប្រជាពលរដ្ឋទូទាំងខេត្តបាត់ដំបងមានចំនួនជាង១លាននាក់ ក្នុងនោះប្រជាពលរដ្ឋនៅក្នុងក្រុងដែលប្រើប្រាស់សេវាប្រមូល និងទុកដាក់សំរាមមានចំនួន១៥ម៉ឺននាក់ បានបង្កើតឡើងនូវសំរាមក្នុងបរិមាណពី១០០ទៅ១៤៥តោនក្នុងមួយថ្ងៃៗ៕
