នៅសាលាខេត្តប៉ៃលិន បានរៀបចំពិធីប្រកាសចូលកាន់មុខតំណែងមន្ត្រីរាជការមន្ទីរអង្គភាពជុំវិញខេត្ត និងពិធីសំណេះសំណាលជាមួយនិវត្តន៍ជន ដែលពិធីនេះស្ថិតក្រោមអធិបតីភាព ឯកឧត្តម កើត សុធា ទីប្រឹក្សារាជរដ្ឋាភិបាល ឯកឧត្តម ឡី ចាន់ឆាយ ទីប្រឹក្សារាជរដ្ឋាភិបាល និង ឯកឧត្តម ផាន់ ចាន់ធុល អភិបាលខេត្តប៉ៃលិន ។
លោក កើត ចំរើន ប្រធានការិយាល័យធនធានមនុស្សបានអាននូវសេចក្តីប្រកាសតែងតាំង អនុប្រធានមន្ទីរ ប្រធាន អនុប្រធានការិយាល័យ បណ្តាមន្ទីរវិស័យរួមមាន មន្ទីរព័តមានខេត្ត មន្ទីរអភិវឌ្ឍន៍ជនបទ មន្ទីរការងារ មន្ទីររៀបចំដែនដីនគរូបនីយកម្មសំណង់និងសូរិយោដីខេត្ត មន្ទីរធម្មការនិងសាសនាខេត្ត ។
ឯកឧត្តម ផាន់ចាន់ធុល អភិបាលខេត្តប៉ៃលិនបានមានប្រសាសន៍លើកឡើងថា៖ ការផ្លាស់ប្ដូរ ឬតែងតាំង សម្រួលភារកិច្ចគឺជាធម្មតាសម្រាប់ក្របខណ្ឌមន្ត្រីរាជការ របស់រាជរដ្ឋាភិបាល ទៅតាមគុណបំណាច់ និងស្នាដៃក្នុងការបម្រើជាតិ និងប្រជាជននាពេលកន្លងមក ដូច្នេះក្រោយពីការតែងតាំង អនុប្រធានមន្ទីរ ប្រធាននិងអនុប្រធានការិយាល័យតាម បណ្តាមន្ទីរវិស័យ នឹងមានរចនាសម្ព័ន្ធថ្នាក់ដឹកនាំគ្រប់គ្រាន់ ដែលអាចមានលទ្ធភាពបំពេញការងារបំរើប្រជាពលរដ្ឋអោយបានកាន់តែល្អប្រសើរ និងទាន់ពេលវេលា តាមសេចក្តីត្រូវការរបស់បងប្អូនប្រជាពលរដ្ឋស្របតាមគោលនយោបាយរបស់រាជរដ្ឋាភិបាលកម្ពុជា ប្រកបដោយស្មារតីទទួលខុសត្រូវ ក្នុងការបំពេញភារៈកិច្ចថ្មី សហការជាមួយអង្គភាពនានា សំដៅបំពេញកិច្ចបម្រើជាតិ និងប្រជាជនអោយទទួលបានជោគជ័យ និងមានការអភិវឌ្ឍន៏លើគ្រប់វិស័យក្នុងខេត្តប៉ៃលិនអោយបានជាបន្តបន្ទាប់។ ក្នុងឱកាសនោះដែរឯកឧត្តមអភិបាលខេត្តបានណែនាំនិងផ្តាំផ្ញើរដល់មន្ត្រីរាជការដែលទើបតែងតាំងថ្មីទាំងអស់ ត្រូវពង្រឹងសមត្ថភាពនិងបង្កើតធនធានអោយមានចំណេះជំនាញក្នុងអង្គភាពរបស់ខ្លួន ប្រកបដោយគុណភាពដើម្បីអនុវត្តន៍ការងារអោយទទួលបានជោគជ័យ ជាពិសេសត្រូវពង្រឹងសាមគ្គីភាពផ្ទៃក្នុង និងប្រមូលផ្តុំមន្ត្រីក្រោមឱវាទ មកធ្វើការងារជាសមូហភាពរួមគ្នាធ្វើការងារហើយត្រូវសហការល្អ ជាមួយរដ្ឋបាលខេត្ត មន្ទីរអង្គភាពជុំវិញខេត្ត និងគ្រប់បណ្តាក្រុង ស្រុកនៅក្នុងខេត្ដ ព្រោះថាការពង្រឹងសមត្ថភាពនេះហើយដែល ធ្វើអោយយើងនិងអង្គភាពមានការរីកចំរើន ជាពិសេសចូលរួមអភិវឌ្ឍន៍ខេត្តនិងប្រទេសជាតិទាំងមូល ។
ក្នុងឱកាសនោះដែរ ឯកឧត្តម ផាន់ចាន់ធុល អភិបាលខេត្តប៉ៃលិន បានឧបត្ថម្ភថវិកាដល់ ដល់បងប្អូននិវត្តន៍ជនដែលចូលរួមជាង១៥០នាក់ម្នាក់ៗ ៥ម៉ឺនរៀលផងដែរ ។