រសៀលថ្ងៃពុធ ១៤កេីត ខែបុស្ស ឆ្នាំកុរ ឯកស័ក ព.ស ២៥៦៣ ត្រូវនឹងថ្ងៃទី០៨ ខែមករា ឆ្នាំ២០២០ ឯកឧត្តម ចាន់ យុត្ថា រដ្ឋលេខាធិការក្រសួងធនធានទឹក និងឧតុនិយម និងជាប្រធានមុខព្រួញខេត្តបាត់ដំបង ខេត្តបន្ទាយមានជ័យ និងខេត្តឧត្តរមានជ័យ បានចុះពិនិត្យ និងអន្តរាគមន៍បូមទឹកសង្រ្គោះស្រូវប្រាំងក្នុងខេត្តបន្ទាយមានជ័យ ។ ឯកឧត្ដមរដ្ឋលេខាធិការ បានឲ្យដឹងថា យោងតាមការពិនិត្យជាក់ស្ដែង ប្រភពទឹកនៅស្ទឹងមង្គលបូរី អាចធានាការប្រើប្រាស់បានតែក្នុងរយៈពេល ០៣ ថ្ងៃទៀតប៉ុណ្ណោះ ។ នេះ គឺដោយហេតុថា ស្រុកមង្គលបុរី មានការដាំដុះស្រូវប្រាំងរហូតដល់ទៅជិត ៨ មុឺនហិកតា ( ផែនការខេត្ត ៧ ពាន់ហិកតា ) ក្នុងនោះមានការដាំដុះស្រូវប្រាំងលើកទី ១ ជាង ៥ មុឺនហិកតា និងស្រូវប្រាំងលើកទី ២ ជាង ២ មុឺនហិកតា ។
ចំពោះមុខបញ្ហានេះ ឯកឧត្តមរដ្ឋលេខាធិការបានដឹកនាំក្រុមការងារ បង្វែរទឹកពីប្រភពផ្សេងមកកាន់ស្រុក ដោយដំឡើងស្ថានីយបូមទឹកចេញពីស្ទឹងសិរីសោភណ្ឌ ទម្លាក់ចូលប្រឡាយមេ ឲ្យហូរចូលទៅក្នុងស្ទឹងមង្គលបុរី ។ ទន្ទឹមនេះ ឯកឧត្តមរដ្ឋលេខាធិការ ក៏បានណែនាំដល់អាជ្ញាធរស្រុក ឃុំ ជួយផ្សព្វផ្សាយដល់ប្រជាពលរដ្ឋ សូមកុំធ្វើការដាំដុះស្រូវប្រាំងបន្ថែមទៀត ព្រោះទឹកដែលបង្វែរទៅនេះ គឺអាចឆ្លើយតបតែទៅលើការប្រើប្រាស់ក្នុងជីវភាពប្រចាំថ្ងៃតែប៉ុណ្ណោះ ក្នុងការប្រើប្រាស់ទៀតសោត ក៏ត្រូវចូលរួមសន្សំសំចៃ ព្រោះរដូវប្រាំង នៅសល់រយៈពេលវែងទៀត ៕