(ភ្នំពេញ)៖ នាយប់រំលងអាធ្រាតថ្ងៃទី១៥ ខែកុម្ភៈ ឆ្នាំ២០២០ ក្រសួងសុខាភិបាលនៃព្រះរាជាណាចក្រកម្ពុជា ស្នើឲ្យម៉ាឡេស៊ី ពិនិត្យឡើងវិញ ចំពោះការរកឃើញថា មានស្រ្តីអាមេរិកាំងម្នាក់ លើនាវា Westerdam ដែលចេញពីកម្ពុជា មានផ្ទុកវីរុសកូរ៉ូណា Covid-19។
ការទាមទារឲ្យពិនិត្យឡើងវិញនេះ បានធ្វើឡើងតាមរយៈសេចក្តីប្រកាសព័ត៌មាន បន្ទាប់ពីប្រទេសម៉ាឡេស៊ី លើកឡើងថា ខ្លួនបានធ្វើតេស្តវិជ្ជមានវីរុសកូរ៉ូណាថ្មី Covid-19 លើជនជាតិអាមេរិកកាំងម្នាក់ ក្រោយពីបានចាកចេញពីនាវាខ្នាតធំ Westerdam ចូលសំចត នៅកម្ពុជា។
ក្រសួងសុខាភិបាលនៃព្រះរាជាណាចក្រកម្ពុជា បានប្រកាសថា៖ នៅក្នុងពេលប៉ុន្មានម៉ោងមុននេះ មានការផ្សព្វផ្សាយព័ត៌មាន ស្ដីពី ករណីស្ត្រីជនជាតិអាមេរិកាំងម្នាក់អាយុ ៨៣ឆ្នាំ ដែលអាជ្ញាធរម៉ាឡេស៊ី ពិនិត្យឃើញថា មានផ្ទុក Covid-19 នៅប្រទេសម៉ាឡេស៊ី។
ករណីនេះ មុននឹងចាកចេញរបស់បុគ្គលរូបនេះ ក៏ដូចជាអ្នកទេសចរដទៃទៀតពីនាវាខ្នាតធំ Westerdam ត្រូវបបានក្រសួងសុខាភិបាល ពិនិត្យយ៉ាងល្អិតល្អន់ និងធ្វើការជាមួយអង្គការសុខភាពពិភពលោក ព្រមទាំងអង្គការ USCDC របស់អាមេរិក ហើយយើងបានអនុវត្តតាមស្តង់ដារបច្ចេកទេស និងនិយ័តកម្មសុខភាពអន្តរជាតិ ឆ្នាំ ២០០៥ របស់អង្គការសុខភាពពិភពលោក។
ចំពោះករណី ដែលបានប្រកាស ដោយអាជ្ញាធរម៉ាឡេស៊ី និងភាពវិជ្ជមានលើវីរុស Covid-19 ក្រសួងសុខាភិបាលនៃព្រះរាជាណាចក្រកម្ពុជា ស្នើសុំឲ្យអាជ្ញាធរម៉ាឡេស៊ី ពិនិត្យឡើងវិញ អំពីលទ្ធភាពនៃការធ្វើតេស្តនេះ ឲ្យមានភាពសុក្រិតឡើងវិញ៕ SN-ពុទ្ធិរៈ