គំរោងសាងសង់ស្ពានឆ្លងកាត់ទន្លេល្ពៅត្រង់ព្រំប្រទល់ខេត្តព្រះវិហារនិងខេត្តចំប៉ាសាក់ឡាវ


(​ព្រះវិហារ​)៖​កាលពី​ថ្ងៃទី​២៧ ខែមករា ឆ្នាំ​២០១៧​នេះ​គណៈកម្មការ​ព្រំដែន​កម្ពុជា​-​ឡាវ មួយក្រុម​ដែល​ដឹកនាំ​ដោយ​លោក​ឡុង វិ​សា​លោ រដ្ឋ​​លេខាធិការ​ក្រសួងការបរទេស​និង​សហប្រតិបត្តិការ​អន្តរជាតិ​និង​ជា​ឯកអគ្គរាជទូត​ព្រះរាជាណាចក្រ​កម្ពុជា​ប្រចាំ​នៅ​ព្រះរាជណាចក្រ​ថៃ​​ដែល​ក្នុងនោះ​មាន​សមាសភាព​មកពី​ក្រសួងការបរទេស​កម្ពុ​ជា​និង​ឡាវ ក្រសួង​សាធារណការ​និង​ដឹកជញ្ជូន​កម្ពុជា​និង​ឡាវ លោក​អភិ​​បាល​ខេត្តព្រះវិហារ​និង​លោក​អភិបាលខេត្ត​ចំប៉ា​សាក់​របស់​ឡាវ បាន​ចុះទៅពិនិត្យ​ទីតាំង​សង់ស្ពាន​ឆ្លងទន្លេ​ល្ពៅ​ស្ថិតនៅក្នុង​ឃុំ​កំពង់​​ស្រឡៅ ស្រុក​ឆែប ខេត្តព្រះវិហារ​ដោយ​ឆ្លង​ពី​ព្រំដែន​កម្ពុជា​ទៅកាន់​ប្រទេស​ឡាវ​នៅក្នុង​ខេត្ត​ចំប៉ា​សាក់​។​
​    ​
​          មន្ត្រី​ដែល​បាន​ទៅ​ចូលរួម​ក្នុង​ប្រតិភូ​ខាងលើ​បានឱ្យដឹងថា​៖​ការចុះទៅ​ពិនិត្យ​នេះ​បាន​ធ្វើឡើង​បន្ទាប់ពី​គណៈកម្មការ​ព្រំដែន​ប្រទេស​ទាំង​ពីរបាន​បើក​កិច្ចប្រជុំ​រួមគ្នា​នៅ​ដើម​សប្តាហ៍​នេះ​។​គួរ​បញ្ជាក់ថា​៖​កាលពី​ឆ្នាំ​២០១៦​កន្លងមក​ភាគី​កម្ពុជា​និង​ភាគី​ឡាវ​បាន​ឯកភាពគ្នា​ជាគោលការណ៍​ដើម្បី​គ្រោង​សាងសង់​ស្ពានបេតុង​ឆ្លងទន្លេ​ល្ពៅ​ក្នុង​ឃុំ​កំពុង​ស្រឡៅ ស្រុក​ឆែប ខេត្តព្រះវិហារ​ជាប់​ព្រំប្រទល់​ខេត្ត​ចំប៉ា​សាក់​​ប្រទេស​ឡាវ​។​
​    ​
​          គំរោង​សាងសង់​ស្ពាន​ឆ្លងកាត់​ទន្លេ​ល្ពៅ​និង​ផ្លូវ​ថ្មី​ប្រើប្រាស់​កំចី​ឥណទាន​ពី​រដ្ឋាភិបាល​ចិន​។​
​    ​    ​
​          លោក​សំ លាង​ទ្រី ប្រធាន​មន្ទីរ​សាធារណៈការ​និង​ដឹកជញ្ជូន​ខេត្តព្រះវិហារ​ឲ្យ​ដឹងថា​ស្ពាន​ទន្លេ​ល្ពៅ​ដែល​គ្រោង​សាងសង់​នេះ​មាន​ប្រវែង​១៤៥​ម៉ែត្រ​ហើយ​នៅពេល​សាងសង់​រួច​ស្ពាន​និង​ផ្លូវ​នេះ​នឹង​ក្លាយជា​សរសៃឈាម​សេដ្ឋកិច្ច​ដ៏​សំខាន់​បំរើ​ឲ្យ​វិស័យ​ពាណិជ្ជកម្ម​,​សេដ្ឋកិច្ច​និង​ពិសេស​ទេសចរណ៍​ក៏ដូចជា​ការរួមចំណែក​ពង្រឹង​សន្តិសុខ​សណ្តាប់ធ្នាប់​តាម​ព្រំដែន​ផងដែរ​៕