ភ្នំពេញ៖ សម្ដេចតេជោ ហ៊ុន សែន នាយករដ្ឋមន្ត្រី នៃកម្ពុជា បានប្រតិកម្មខ្លាំងៗចំពោះការលើកឡើងរបស់ ឯកឧត្ដម សម រង្ស៊ី ប្រធានគណបក្ស សង្រ្គោះជាតិ ពីប្រវត្តិសាស្រ្តក៥ ហើយថាមេបក្សប្រឆាំងនេះ ភ្លីភ្លើអត់ដឹងរឿង ប្រវត្តិសាស្រ្ត ក៥ កើតមានដោយសារអ្វី ព្រោះផែនការ ក៥ កើតមានឡើងដោយសារពួកក្រុមឯកឧត្ដមសម រង្ស៊ី ។
ក្នុងពិធីចែកសញ្ញាបត្រ ដល់និស្សិតសកលវិទ្យាល័យ ជាតិគ្រប់គ្រង នៅព្រឹកថ្ងៃទី២ ខែកុម្ភៈ ឆ្នាំ២០១៧ សម្ដេចតេជោ បានថ្លែងខ្លាំងៗថា “ហើយមួយនោះដាក់មក ស្អីទៀតទេ អី ក៥ ផ្ដាំទៅត្រឡប់ទៅវិញ ក៥ ដោយសារក្បាល ពួកលោកឯងហ្នឹងហើយ បានវាមាន ក៥ តាមរយៈការវិលត្រឡប់មកវិញ នៃរបបប្រល័យពូជសាសន៍ ប៉ុល ពត សមពួកក្បាលលោកឯងនោះទេ ជាអ្នកទទួលខុសត្រូវ លើសោកនាដកម្មរបស់ ប្រជាជនកម្ពុជា រឿងអីទៅធ្វើសម្ព័ន្ធភាព ជាមួយខ្មែរក្រហម មកវាយបំផ្លាញ ការរស់ឡើងវិញរបស់ប្រជាជនកម្ពុជា បើលោកឯងស្នេហ៍ស្និតជាមួយ ខ្មែរក្រហមលោកឯងចូលមក ឲ្យវាជាប់ទោសជាមួយគេទៅ ភ្លីភ្លើអត់ដឹងប្រវត្តិសាស្រ្ត” ។
សម្ដេចបន្តថា ការកាត់ទោសខ្មែរក្រហម ដោយសារខ្មែរក្រហមអាក្រក់ សម្លាប់ខ្មែរគ្នាឯង ។ សម្ដេចថា អញ្ចឹងសម្ដេច ការពារការវិលត្រឡប់របស់ខ្មែរក្រហម អត់មានអ្វីខុសទេ ហើយថ្ងៃនេះមានសន្តិភាព ដោយសារតែរំលំ ប៉ុល ពត និងទប់ស្កាត់មិនឲ្យ ប៉ុល ពត ត្រឡប់មកវិញបាន ។
ទាក់ទិនទៅនឹងអ្នកដែល ជេរប្រមាថថ្ងៃ៧ មករា សម្ដេចតេជោ បានប្រតិកម្មទៅវិញថា អ្នកជេរប្រមាថថ្ងៃ៧ មករា ស្មើនឹងមើលងាយវិញ្ញាណក្ខន្ធ ដែលបានស្លាប់ រាប់ទាំងក្រុមគ្រួសារអ្នកឯងផងដែរ ៕
