(ភ្នំពេញ)៖ រាជរដ្ឋាភិបាលបានយល់ព្រមផ្តល់ដីបឹងតាមោក (បឹងកកប់ស្រូវ) ទំហំ ៧៥ហិកតា ស្ថិតក្នុងសង្កាត់គោករកា ខណ្ឌព្រែកព្នៅ រាជធានីភ្នំពេញ ជូនរដ្ឋបាលរាជធានីភ្នំពេញ ដើម្បីបង្កើតសួន និងឧទ្យានធម្មជាតិសាធារណៈ និងសាងសង់នាយកដ្ឋានសន្តិសុខ។ នេះបើយោងតាមលិខិតរបស់ទីស្តីការគណៈរដ្ឋមន្ត្រី ចុះថ្ងៃទី១៣ ខែមីនា ឆ្នាំ២០២០ ជម្រាបទៅរដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ រដ្ឋមន្ត្រីក្រសួងរៀបចំដែនដី នគរូបនីយកម្មណនិងសំណង់ និងអភិបាល នៃគណៈអភិបាលរាជធានីភ្នំពេញ ដែលខ្លីៗ ទើបតែទទួលបាននៅព្រឹកថ្ងៃទី១៨ ខែមីនា ឆ្នាំ២០២០។
យោងតាមលិខិតដាច់ដោយឡែកមួយទៀតរបស់ទីស្តីការគណៈរដ្ឋមន្ត្រី ចុះថ្ងៃទី១៣ ខែមីនា ឆ្នាំ២០២០ បានជម្រាបជូនរដ្ឋមន្ត្រីក្រសួងមហាផ្ទៃ រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ រដ្ឋមន្ត្រីក្រសួងរៀបចំដែនដី នគរូបនីយកម្មណនិងសំណង់ រដ្ឋមន្ត្រីក្រសួងធនធានទឹក និងឧតុនិយម និងអភិបាល នៃគណៈអភិបាលរាជធានីភ្នំពេញបានឲ្យដឹងដែរថា “រាជរដ្ឋាភិបាលបានយល់ព្រមផ្តល់ដីបឹងតាមោក (បឹងកកប់ស្រូវ) ទំហំ ៨ហិកតា ស្ថិតក្នុងសង្កាត់គោករកា ខណ្ឌព្រែកព្នៅ រាជធានីភ្នំពេញ (ដូចមានផែនទីបង្ហាញទីតាំង និងនិយាមកាភ្ជាប់មកជាមួយ) ជូននាយកដ្ឋានកណ្តាលសន្តិសុខ នៃអគ្គស្នងការនគរបាលជាតិ ក្រសួងមហាផ្ទៃ ដើម្បីសាងសង់អគារ និងហេដ្ឋារចនាសម្ព័ន្ធនានាសម្រាប់បងម្រើការងារ”។
ការសម្រេចយល់ព្រមផ្តល់ដីបឹងតាមោកទំហំ ៧៥ហិកតា ជូនរដ្ឋបាលរាជធានីភ្នំពេញ ដើម្បីបង្កើតសួន និងឧទ្យានធម្មជាតិសាធារណៈនៅរាជធានីភ្នំពេញ និងទំហំ ៨ហិកតា ជូននាយកដ្ឋានកណ្តាលសន្តិសុខ ដើម្បីសាងសង់អគារ គឺយោងតាមលិខិតលេខ ០១៦-០១៧/២០ លស.គ ចុះថ្ងៃទី៥ ខែមីនា ឆ្នាំ២០២០ របស់រដ្ឋបាលរាជធានីភ្នំពេញ , លិខិតលេខ ១២៧-១២៨ ខន/០២០ ចុះថ្ងៃទី៩ ខែមីនា ឆ្នាំ២០២០ របស់ខុទ្ទកាល័យសម្តេចនាយករដ្ឋមន្ត្រី និងចំណារដ៏ខ្ពង់ខ្ពស់បំផុតរបស់សម្តេចនាយករដ្ឋមន្ត្រី ហ៊ុន សែន ចុះថ្ងៃទី៨ ខែមីនា ឆ្នាំ២០២០។
សូមជម្រាបថា បឹងតាមោក (បឹងកប់ស្រូវ) មានទំហំ ៣.២៣៥,៧ហិកតា ស្ថិតក្នុងសង្កាត់គោករកា ខណ្ឌព្រែកព្នៅ រាជធានីភ្នំពេញ៕
