លោកស្រីឱវណ្ណឌីនរដ្ឋលេខាធិការនិងជាអ្នកនាំពាក្យរបស់ក្រសួងសុខាភិបាលបានអំពាវនាវឱ្យប្រជាពលរដ្ឋទាំងអស់ រក្សាភាពនឹងនរក្នុងចិត្តនិងសូមកុំមានការភ័យខ្លាចព្រមទាំងជឿជាក់លើវិធានការប្រយុទ្ធនឹងជំងឺកូវីដ-១៩នេះ របស់រាជរដ្ឋាភិបាលកម្ពុជា។
លោកស្រីបានមានប្រសាសន៍ថាករណីឆ្លងជំងឺ Covid-19 ទាំងអស់នេះ គឺជាករណីនាំចូលហើយអ្នកដែលរកឃើញករណីឆ្លងជំងឺ Covid-19 នោះរួមមាន៖នៅរាជធានីភ្នំពេញ ខេត្តព្រះវិហារ បន្ទាយមានជ័យ បាត់ដំបង កំពត ត្បូងឃ្មុំ កំពង់ឆ្នាំង កោះកុង និងខេត្តកែបជាដើម។
លោកស្រីបានបញ្ជាក់ថាបច្ចុប្បន្នអ្នកទាំងអស់នោះ ត្រូវបានដាក់ឱ្យនៅដាច់ដោយឡែក ដើម្បីតាមដានព្យាបាល។
លោកស្រីបានបន្ថែមថា ករណីឆ្លងជំងឺ Covid-19 នៅកម្ពុជាបានកើនឡើងដល់ចំនួន៣៥នាក់ហើយនៅថ្ងៃទី១៨ ខែមីនា ឆ្នាំ២០២០នេះ បន្ទាប់ពីបានរកឃើញនូវករណីឆ្លងជំងឺ Covid-19 ចំនួន២ករណីថែមទៀតនៅលើខ្លួនជនជាតិម៉ាឡេស៊ី២នាក់ កាលពីយប់ថ្ងៃទី១៧ ខែមីនា ឆ្នាំ២០២០នោះ។
ទន្ទឹមនេះកម្ពុជាបានរកឃើញនូវករណីឆ្លងជំងឺ Covid-19 ចំនួន២ករណីថែមទៀតនៅលើខ្លួនជនជាតិម៉ាឡេស៊ី២នាក់ដែលធ្វើឱ្យករណីឆ្លងសរុបនៅក្នុងប្រទេសកម្ពុជាបានកើន ដល់៣៥នាក់ គិតត្រឹមព្រឹកថ្ងៃទី១៨ ខែមីនា ឆ្នាំ២០២០នេះ។ បន្ទាប់ពីមានការកើនឡើងចំនួនអ្នកវិជ្ជមាន Covid-19នៅក្នុងប្រទេសរហូតដល់៣៥នាក់នោះ ក្រសួងសុខាភិបាលបានចេញសេចក្តីជូនដំណឹង និងណែនាំ ព្រមទាំងចាត់វិធានការ ការពារផ្សេងៗជាបន្តបន្ទាប់ ដើម្បីចៀសវាងការរីករាលដាល ជំងឺកូវីដ-១៩ នៅក្នុងសហគមន៍ ដូចជា ការបិទ KTV រោងភាពយន្ត ក្លិបកម្សាន្ត សារមន្ទីរ នៅទូទាំងប្រទេស។ ទន្ទឹមនឹងនេះ ក៏បានប្រកាសបិទជាបណ្តោះអាសន្ននូវការជួបជុំបែបសាសនាគ្រប់ប្រទេសទាំងអស់ផ្អាកការប្រគំតន្ត្រីនៅតាមទីធ្លាសាធារណៈដែលមានមនុស្សច្រើនកុះករចូលរួមផងដែរ។ល។ ជាមួយនេះផងដែរ ក្រសួងសុខាភិបាលក៏នឹងសហការជាមួយរដ្ឋបាលរាជធានីភ្នំពេញ ដើម្បីប្រើប្រាស់សណ្ឋាគារ Great DUKE (អតីតសណ្ឋាគារអាំងទែកុងទីណង់តាល់)ជាមន្ទីរពេទ្យសម្រាប់ពិនិត្យថែទាំនិងព្យាបាលអ្នកជំងឺ Covid-19។ល។ រាជរដ្ឋាភិបាលក៏បានចេញសារាចរណែនាំដល់ប្រជាពលរដ្ឋទាំងអស់សូមកុំធ្វើដំណើរទៅកាន់បណ្ដាប្រទេសនៅអឺរ៉ុប សហរដ្ឋអាមេរិក និងអ៊ីរ៉ង់។ប្រសិនបើមិនមានការចាំបាច់បំផុតដែលខានពុំបាន។ គ្រប់ក្រសួង ស្ថាប័នរដ្ឋទាំងអស់ទាំងនៅថ្នាក់ជាតិ និងថ្នាក់ក្រោមជាតិ មិនត្រូវអនុញ្ញាតឱ្យមន្ត្រីរាជការបុគ្គលិកគ្រប់លំដាប់ថ្នាក់ធ្វើដំណើរចូលរួមកិច្ចប្រជុំគ្រប់ប្រភេទ ទៅកាន់បណ្ដាប្រទេសនៅអឺរ៉ុប សហរដ្ឋអាមេរិក និងអ៊ីរ៉ង់ឡើយ។ ក្នុងករណីចាំបាច់ខានមិនបានដែលតម្រូវឱ្យមានតំណាងរបស់កម្ពុជាចូលរួមប្រជុំ នៅបណ្ដាប្រទេសដូចបញ្ជាក់ខាងលើ ក្រសួងស្ថាប័នពាក់ព័ន្ធនីមួយៗត្រូវធ្វើសំណើទៅកាន់ក្រសួងការបរទេសនិងសហប្រតិបត្តិការអន្តរជាតិ ដើម្បីចាត់តំណាងស្ថានទូតប្រចាំនៅប្រទេសម្ចាស់ផ្ទះនៃការប្រជុំឱ្យចូលរួមជំនួស។ ក្រៅពីនេះ ចំពោះមន្ត្រីរាជការ និងប្រជាពលរដ្ឋកម្ពុជាទាំងឡាយណាដែលទើបវិលត្រឡប់មកពីបណ្ដាប្រទេសនៅអឺរ៉ុប សហរដ្ឋអាមេរិក និងអ៊ីរ៉ង់ ត្រូវដាក់ខ្លួនឱ្យនៅដាច់ដោយឡែកក្នុងរយៈពេល១៤ ថ្ងៃគិតចាប់ពីថ្ងៃដែលបានត្រឡប់មកដល់ព្រះរាជាណាចក្រកម្ពុជាវិញស្របតាមនីតិវិធីកំណត់ដោយក្រសួងសុខាភិបាល។សូមជំរាបជូនថា គិតត្រឹមព្រឹកថ្ងៃទី ១៨ មីនានេះ កម្ពុជាបានរកឃើញករណីអ្នកផ្ទុកជំងឺកូវីដ១៩ សរុបចំនួន ៣៥ករណីហើយ ដោយក្នុងនោះ ៣៤ករណី ជាករណីនាំចូលមកពីក្រៅប្រទេស និង ០១ករណី ជាករណីប៉ះពាល់ផ្ទាល់ជាមួយអ្នកជំងឺជនជាតិជប៉ុននៅក្នុងខេត្តសៀមរាប។
លោកស្រីវេជ្ជបណ្ឌិត ឱ វណ្ណឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាល បានថ្លែងនៅក្នុងសន្និសីទកាសែតនៅទីស្តីការគណៈរដ្ឋមន្ត្រី នាព្រឹកថ្ងៃទី ១៨ មីនានេះថា កម្ពុជាពេលនេះ ពុំទាន់រកឃើញភ័ស្តុតាងបញ្ជាក់ថា មានការឆ្លងក្នុងសហគមន៍នៅឡើយទេ តែលទ្ធភាពអាចនឹងកើតមានឡើង។
បើតាមអ្នកនាំពាក្យរូបនេះ ជំហានថ្មីរបស់កម្ពុជាពេលនេះ គឺត្រូវទប់ស្កាត់កុំឲ្យមានការចម្លងនៅក្នុងសហគមន៍។ ហើយជាវិធានការ ដើម្បីទប់ស្កាត់ការចម្លងនៅក្នុងសហគមន៍នេះ លោកស្រីវេជ្ជបណ្ឌិត ហាមកុំឲ្យមានការជួបជុំគ្នាច្រើន។ជាពិសេសជាមួយអ្នកដែលមានប្រវត្តិទើបធ្វើដំណើរត្រឡប់មកពីក្រៅប្រទេស។សូមបញ្ជាក់ថា ក្នុងចំណោម៣៥ករណីដែលកម្ពុជារកឃើញមានផ្ទុកជំងឺកូវីដ១៩នៅកម្ពុជានេ រួមមាន ជនបរទេសសរុប១៣នាក់ ក្នុងនោះ ជនជាតិចិន១នាក់ អង់គ្លេស ៣នាក់ បារាំង២នាក់ កាណាដា១នាក់ ប៊ែលហ្សិក១នាក់ និងម៉ាឡេស៊ីចំនួន៥នាក់។ ក្រៅពីនេះ មានជនជាតិខ្មែរ២នាក់ និងជនជាតិខ្មែរឥស្លាមសរុបចំនួន២០នាក់។ក្នុងចំណោមអ្នកផ្ទុកជំងឺកូវីដ១៩ខាងលើនេះពួកគេសុទ្ធតែមានប្រវត្តិធ្វើដំណើរមកពីក្រៅប្រទេស មុននឹងរកឃើញមានផ្ទុកជំងីកូវីដ១៩ នៅក្នុងប្រទេសកម្ពុជា លើកលែងតែមួយករណីនៅក្នុងខេត្តសៀមរាបដែលបុរសជនជាតិខ្មែរអាយុ៣៨ឆ្នាំបានឆ្លងផ្ទាល់ពីបុរសជនជាតិជប៉ុនផ្ទុកជំងឺកូវីដ១៩៕
