ភ្នំពេញ ៖ ថ្ងៃទី២៥ ខែមីនា ឆ្នាំ២០២០ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានអះអាងថា ពិធីបុណ្យចូលឆ្នាំថ្មីប្រពៃណីជាតិខ្មែរនៅតែធ្វើជាធម្មតា ប៉ុន្តែគ្មានការរៀបចំសង្រ្កាន្ដ និងការប្រជុំតន្ត្រីនោះទេ គឺសប្បាយតាមគ្រួសាររៀងៗខ្លួន។
ថ្លែងក្នុងពិធីសំណេះសំណាលជាមួយគ្រូពេទ្យស្ម័គ្រចិត្ដសម្ដេចតេជោ ប្រឆាំងនឹងជំងឺ កូវីដ-១៩ នាព្រឹកថ្ងៃទី២៥ ខែមីនា ឆ្នាំ២០២០ នៅវិមានសន្តិភាព សម្តេចតេជោ ហ៊ុន សែន បានលើកឡើងថា ការប្រគុំតន្ត្រីនៅតែឱ្យធ្វើ ប៉ុន្តែមិនចាំបាច់មានការជួបជុំ មើលផ្ទាល់នោះទេ ហើយផ្សាយផ្ទាល់ដើម្បីឱ្យប្រជាជនមើលតាមផ្ទះ។ សម្តេចតេជោបានបញ្ជាក់ថា “យើងធ្វើធម្មតា ពិធីបុណ្យចូលឆ្នាំខ្មែរ ដោយការសប្បាយនៅតាមផ្ទះរៀងៗខ្លួន”។
ក្នុងឱកាសនោះដែរសម្តេចតេជោក៏បានអំពាវនាវដល់ប្រជាពលរដ្ឋទាំងអស់ធ្វើការទប់ស្កាត់ជំងឺនេះទាំងអស់គ្នាដោយកុំចេញក្រៅផ្ទះ បើមិនមានចាំបាច់ ធ្វើអនាម័យជាប្រចាំ ពាក់ម៉ាស់ ឬក្រមា ដើម្បីការពារការឆ្លងពីយើង ទៅគេ ឬពីគេមកយើង។ សម្តេចតេជោក៏បានណែនាំដល់សមាជិករាជរដ្ឋាភិបាល សមាជិកព្រឹទ្ធសភា រដ្ឋសភា ដែលចុះជួយនៅមូលដ្ឋានគប្បីទិញក្រមាស ឬម៉ាស់ចែកជូនប្រជាពលរដ្ឋផងដែរ៕
