គិតត្រឹមថ្ងៃទី២៦ ខែមីនា ឆ្នាំ២០២០នេះ លោក ពិន ប្រាកដ អភិបាលរងខេត្ត តំណាងដ៏ខ្ពង់ខ្ពស់ ឯកឧត្តម ទៀ សីហា អភិបាល នៃគណៈអភិបាលខេត្ត បានដឹកនាំក្រុមការងារចុះត្រួតពិនិត្យ ផ្លូវពីបុរី អាក់ខេត ទៅផ្លូវអតីតមណ្ឌលកំសាន្តបាខែង កំពុងដំណើរការសាងសង់ចាក់បេតុង ដោយគម្រោងរដ្ឋបាលខេត្ត ឆ្នាំ២០១៩ សម្រេចលទ្ធផលបានប្រមាណ ៧០ភាគរយ។
សូមបញ្ជាក់ថា ផ្លូវនេះជាផ្លូវមួយខ្សែក្នុងចំណោមគម្រោងរបស់រដ្ឋបាលខេត្ត ក្នុងឆ្នាំ២០១៩ ហេីយផ្លូវនេះមានប្រវែង ៤៦០ម៉ែត្រ ទទឹង ៦ម៉ែត្រ កម្រាស់ ២០សង់ទីម៉ែត្រ ស្ថិតនៅភូមិគ្រួស សង្កាត់ស្វាយដង្គំ ក្រុងសៀមរាប ដេីម្បីរៀបចំបណ្ដាញហេដ្ឋារចនាសម្ព័ន្ធ ក្នុងក្រុងសៀមរាប។
ដូចនេះសូមបងប្អូនសាធារណជនដែលរស់នៅតាមដងផ្លូវនេះ សូមយោគយល់អធ្យាស្រ័យ និងចូលរួមសហការទាំងអស់គ្នា។
រដ្ឋបាលខេត្ត សង្ឃឹមយ៉ាងមុតមាំថា បងប្អូនប្រជាពលរដ្ឋមានស្មារតីចូលរួម ដើម្បីឲ្យគម្រោងនេះអនុវត្តទៅបានតាមការគ្រោងទុក៕
