(ភ្នំពេញ)៖ កាលពីថ្ងៃសៅរ៍ ទី១១ ខែមេសា ឆ្នាំ២០២០ បងប្អូនបុគ្គលិកនិយោជិត ពិសេសបងប្អូនកម្មករកាត់ដេរ នៅបន្តការងារ ជាធម្មតា។ ចំពោះវត្តមានរបស់កម្មករនិយោជិត នៅបន្តការងារជាធម្មតា នៅមុន និងពេលចូលឆ្នាំនេះ ត្រូវបានសម្តេចតេជោ ហ៊ុន សែន លើកឡើងថា រាជរដ្ឋាភិបាល សប្បាយចិត្ត ជាពិសេសឪពុកម្តាយ ក្រុមគ្រួសារបងប្អូនក្មួយៗ សប្បាយចិត្ត ពេលឃើញក្មួយៗ កំពុងបន្តធ្វើការដូច្នេះ។
នៅលើហ្វេសប៊ុកផ្លូវការ សម្តេចតេជោ ហ៊ុន សែន លើកឡើងថា «ពេលដែលបានឃើញកូនក្មួយ កំពុងបន្តធ្វើការនៅក្នុងរោងចក្រ ដែលមានអនាម័យ និងសុវត្ថិភាព គឺរាជរដ្ឋាភិបាលសប្បាយចិត្ត ជាពិសេស ឪពុកម្តាយ ក្រុមគ្រួសារ បងប្អូនក្មួយៗសប្បាយចិត្ត ព្រោះបានដឹងថា កូនក្មួយកំពុងធ្វើការនៅក្នុងកន្លែងដែលមានសុវត្ថិភាពបំផុតមួយ ស្របពេលដែលប្រទេសជាតិយើងកំពុងដាក់បម្រាមផ្អាកមិនអោយពលរដ្ឋធ្វើដំណើរឆ្លងកាត់ពីខេត្តមួយទៅខេត្តមួយ ដើម្បីប្រយុទ្ធប្រឆាំងទប់ស្កាត់ការរីករាលដាលជំងឺឆ្លងកូវីដ-១៩ ដ៏កាចសាហាវបំផុតនេះ»។
សម្តេចតេជោ ហ៊ុន សែន បន្តថា «អរគុណកូនក្មួយកម្មករទូទាំងប្រទេស ដែលបានចូលរួមទប់ស្កាត់ការឆ្លងរីករាលដាលជំងឺកូវីដ-១៩ នៅក្នុងប្រទេសជាតិយើង»៕