(ភ្នំពេញ)៖ អ្នកនាំពាក្យក្រសួងធម្មការ និងសាសនា បានប្រកាសថា ជំងឺកូវីដ១៩ ដែលកំពុងឆ្លងរាតត្បាតនៅលើពិភពលោក មកដល់ថ្ងៃទី១៧ ខែមេសា ឆ្នាំ២០២០ ជំងឺឆ្លងដ៏កាចសាហាវនេះ មិនបានឆ្លងរាតត្បាតនៅក្នុងវត្តអារាម និងនៅវិហារសាសនាឥស្លាម ក៏ដូចជាវិហារសាសនាគ្រឹស្ត នៅក្នុងប្រទេសកម្ពុជានោះទេ។
ឯកឧត្តម សេង សុមុនី រដ្ឋលេខាធិការ និងជាអ្នកនាំពាក្យក្រសួងធម្មការ និងសាសនា បានប្រកាសដូច្នេះ នៅក្នុងសន្និសីទកាសែត រៀបចំដោយអង្គភាពអ្នកនាំពាក្យរាជរដ្ឋាភិបាលកម្ពុជា កាលពីព្រឹកថ្ងៃទី១៧ ខែមេសា ឆ្នាំ២០២០ នៅទីស្តីការគណៈរដ្ឋមន្ត្រី។
ឯកឧត្តម សេង សុមុនី លើកឡើងថា នៅទូទាំងប្រទេសកម្ពុជាយើង គិតត្រឹមបំណាច់ឆ្នាំ២០១៩ មានវត្តអារាមព្រះពុទ្ធសាសនា ចំនួន ៥០២៤វត្ត ព្រះសង្ឃ ៧១៦១០អង្គ ( សម្តេចសង្ឃ ១២ព្រះអង្គ ខាងមហានិកាយ និង ៣ព្រះអង្គ ខាងធម្មយុត្តិ)។ រីឯវិហារសាសនាឥស្លាម មានចំនួន ៥៦៨ ព្រះវិហារ និងមានសាសនិកឥស្លាមចំនួន ៦៧០៤៨៣ នាក់។ រីឯគ្រឹស្តសាសនា មានបរិស័ទចំនួន ១១៤៤០២នាក់។ ប្រជាពលរដ្ឋខ្មែរជាង ៩៥% ជាអ្នកកាន់ព្រះពុទ្ធសាសនា ដែលជាសាសនារបស់រដ្ឋ។
ឯកឧត្តម សេង សុមុនី បន្តថា នៅតាមវត្តអារាម ដែលជាកន្លែងរស់នៅជុំគ្នា ក្រៅតែពីព្រះសង្ឃ ក៏មានក្មេងវត្ត តាយាយ ជាដើមផងនោះ គឺយើងពុំមានករណីឆ្លងរាតត្បាតជំងឺកូវីដ១៩ នៅតាមវត្តទេ។ នៅវិហារឥស្លាម វិហារគ្រឹស្តសាសនា ក៏មិនមានករណីឆ្លងរាលដាលជំងឺកូវីដ ដោយតាមវត្តអារាម ក៏ដូចជាវិហារសាសនាឥស្លាម និងគ្រឹស្តសាសនា បានអនុវត្តតាមការណែនាំរបស់រាជរដ្ឋាភិបាល ក៏ដូចជាក្រសួងសុខាភិបាល ពាក់ព័ន្ធនឹងវិធានការការពារការឆ្លងរាលដាលជំងឺកូវីដ១៩ រួមទាំងការផ្អាការជួបជុំតាមវត្ត និងវិហារសាសនា ជាដើម។
ឯកឧត្តម សេង សុមុនី បញ្ជាក់ថា «ថ្មីៗនេះ យើងជួបនូវបញ្ហារឿងកូវីដ១៩នេះ សម្រាប់វិស័យសាសនា ស្ថាប័នផ្សេងៗមើលមកឃើញមានហានិភ័យធំជាងគេ។ ដោយសារអី? លក្ខណៈទី១ ដោយសារព្រះពុទ្ធសាសនា គឺថារស់នៅជុំគ្នា។ ក្នុងវត្តមួយ មានរហូតទៅដល់ ៥០០, ៣០០, ២០០ ឬក៏ ១០០០ រូបក៏មានដែរ។ មានទាំងព្រះសង្ឃ មានទាំងក្មេងស្នាក់នៅក្នុងវត្ត។ ឧទាហរណ៍ដូចជា វត្តបទុម វត្តលង្ការ សុទ្ធតែរាប់ពាន់ ដោយសារតែមានសិស្សនិស្សិតស្នាក់នៅក្នុងវត្ត និងព្រះសង្ឃ ដែលរៀននៅក្នុងវត្តផង ចូលដល់ថ្នាក់រាប់ពាន់។ អីចឹងជាហានិភ័យដែលយើងជួបប្រទះ គឺថាមានការខ្វល់ខ្វាយ។ ទាំងផ្នែកជំនាញស្ថាប័នសុខភាព ក៏ដូចជាជំនាញខាងសាសនា មានការខ្វល់ខ្វាយ។ ចំណុចទី២ សាសនាផ្សេងៗ ដែលត្រូវប្រារព្ធពិធីនៅប្រទេសផ្សេងៗ ហើយចំណុចទី៣ គឺការប្រមូលផ្តុំគ្នារវាងសាសនាទាំងអស់ នៅគ្រប់សាសនាទាំងអស់នៅកម្ពុជា ឧទាហរណ៍ ព្រះពុទ្ធសាសនា រដូវចូលឆ្នាំ ប៉ុន្មានថ្ងៃមុននេះ ហើយសាសនាផ្សេងៗ ក៏ត្រូវជួបជុំថ្វាយបង្គំ…។ ប៉ុន្តែជាដំណោះស្រាយ យន្តការសាសនារបស់យើង រៀបចំផ្នែកជំនាញទាំងអស់ ធ្វើសកម្មភាពរួមគ្នា… ព្រះពុទ្ធសាសនា គណៈសង្ឃ ចេញសារជាលាយក្ខណ៍អក្សរ ទាំងបណ្តាញសង្គម ដល់ព្រះសង្ឃ ពីវិធានការការពារទប់ស្កាត់ការឆ្លងរាលដាលជំងឺកូវីដ១៩។ គ្រឹស្តសាសនា ក៏បានចេញសារទៅកាន់គ្រឹស្តបរិស័ទរបស់លោក ដូចជា ការមិនជួបជុំគ្នាច្រើន ការនៅគម្លាតពីគ្នា ការទទួលទានអាហារឲ្យបានឆ្អិតល្អ ហើយជួបគ្នា កុំឲ្យចាប់ដៃ ជាដើម។ ខាងឥស្លាមសាសនា ក៏ចេញយន្តការដូចគ្នាដែរ»។
ឯកឧត្តម សេង សុមុនី បញ្ជាក់ថា «មកដល់ពេលនេះ សមាសភាពច្រើន ដែលនៅក្នុងទីប្រជុំគ្នា គឺព្រះសង្ឃ មកដល់ពេលនេះ លទ្ធផលមិនទាន់បង្ហាញថា មានព្រះសង្ឃណាមួយ ឆ្លងជំងឺកូវីដ១៩ទេ។ នេះជាយន្តការជោគជ័យមួយរបស់ព្រះសង្ឃនាយក លោកធ្វើការផ្សព្វផ្សាយ ក៏ដូចជាការចែករំលែកព័ត៌មាន និងសម្ភារៈមួយចំនួន ទៅតាមវត្ត ដែលយើងទទួលបានជោគជ័យ។ ដោយឡែក ខាងគ្រឹស្តបរិស័ទ ក៏យើងមិនទទួលបានថា នៅកម្ពុជាមានឆ្លងដែរ។ ចំពោះឥស្លាមសាសនិក ដែលលោកទៅបំពេញពិធីកម្មរបស់លោក គឺយើងគ្រប់គ្រងបាន។ ខាងរដ្ឋាភិបាល ក៏ដូចជាខាងអាជ្ញាធរ និងអ្នកជំនាញគ្រប់គ្រងសាសនា គឺលោកសហការគ្នា មកត្រួតពិនិត្យ ជៀសវាងចម្លងបន្តទៅអ្នកដទៃ»៕