ក្នុងរយៈពេលជាង៣សប្តាហ៍កន្លងមកនេះ វីរុសCovid-19កំពុងឆ្លងរាលដាលយ៉ាងខ្លាំងនៅក្នុងប្រទេស៣ដែលជាប្រទេសសមាជិកអាស៊ាន គឺប្រទេសហ្វីលីពីន ឥណ្ឌូនេស៊ី និងប្រទេសម៉ាឡេស៊ី ដែលប្រទេសនីមួយៗ មានការឆ្លងវីរុសនេះជាង៥០០០ករណី ដែលនេះបើតាមការចុះផ្សាយរបស់ CNBC នៅថ្ងៃនេះ។
គិតត្រឹមថ្ងៃព្រហស្បតិ៍នេះ ហ្វីលីពីនមានមនុស្សចំនួន៥ ៤៥៣នាក់បានឆ្លងវីរុសCovid-19 និងមនុស្សចំនួន៣៤៩នាក់បានបាត់បង់ជីវិត ឥណ្ឌូនេស៊ីមានមនុស្សឆ្លងវីរុសនេះចំនួន៥ ១៣៦នាក់ និងស្លាប់៤៦៩នាក់ និងប្រទេសម៉ាឡេស៊ី មានមនុស្សឆ្លងវីរុសCovid-19ចំនួន៥ ០៧២នាក់ និងមនុស្ស៨៣នាក់បានបាត់បង់ជីវិត ។
ក្រៅពីប្រទេសទាំង៣នេះ ក៏មានប្រទេស៣ទៀតដែរដែលជាប្រទេសសមាជិកអាស៊ាន ដែលមានករណីឆ្លងរាលដាលនៃវីរុសCovid-19ច្រើនជាងគេ គឺមានប្រទេសសិង្ហបុរី ថៃ និងប្រទេសវៀតណាម ដែលសិង្ហបុរីមានការឆ្លងចំនួន៣ ៦៩៩ករណី និងស្លាប់១០នាក់ ថៃមានការឆ្លងចំនួន២ ៦៤៣ករណី និងស្លាប់៤៣នាក់ និងប្រទេសវៀតណាមមានការឆ្លងចំនួន២៦៨ករណី និងគ្មានស្លាប់ ៕
