កំពង់ចាម: អភិបាលនៃគណៈអភិបាលខេត្តកំពង់ចាម ឯកឧត្តម អ៊ុន ចាន់ដា បានជំរុញដល់មន្ត្រីពាក់ព័ន្ធ ឲ្យធ្វើការដឹកនាំប្រកបដោយភាពរស់រវើក នឹងមានសិល្បៈនៃការចែករំលែកទៀតផង ព្រោះថារាល់ភាពជោគជ័យ គឺផ្តេីមចេញពីមានការឯកភាពផ្ទៃក្នុង ដូច្នេះត្រូវយល់អំពីសិល្បៈនៃការដឹកនាំឲ្យបានរីកចម្រើន ដោយឡែកមន្ត្រី បេីដឹងខ្លួនថាមានកំហុសឆ្គង គឺត្រូវធ្វើការកែប្រែជាបន្ទាន់ផងដែរ ការថ្លែងយ៉ាងដូច្នេះក្នុងកិច្ចប្រជុំសាមញ្ញលេីកទី១២ របស់ក្រុមប្រឹក្សាខេត្តកំពង់ចាម អាណត្តិទី៣ ដែលបានធ្វេីឡើងនាព្រឹកថ្ងៃទី៧ ខែឧសភា ឆ្នាំ២០២០ ក្រោមវត្តមានឯកឧត្ដម ខ្លូត ផន ប្រធានក្រុមប្រឹក្សាខេត្ត ដោយមានការចូលរួមពី លោក លោកស្រី ថ្នាក់ដឹកនាំ មន្ទីរ អង្គភាពជុំវិញខេត្ត និងមន្ត្រីពាក់ព័ន្ធជាច្រើនរូបផងដែរ។
ថ្លែងក្នុងកិច្ចប្រជុំនោះដែរ ឯកឧត្តម អ៊ុន ចាន់ដា អភិបាលខេត្តកំពង់ចាម បានលើកឡើងថា ចំពោះអ្នកជំងឺកូវីដ១៩ ចំនួន១៦នាក់ ក្នុងខេត្តកំពង់ចាម ត្រូវបានព្យាបាលជាសះស្បើយអស់ហើយ ដោយឡែកអ្នកជំងឺទូទាំងប្រទេស ដែលមានចំនួន១២២នាក់ ក៏បានព្យាបាលជាសះស្បើយ ចំនួន១២០នាក់ ហើយដែរ ទោះជាយ៉ាងណា យើងនៅតែមានក្តីព្រួយបារម្ភ ព្រោះវីរុសជំងឺកូវីដ១៩ មិនទាន់ទៅណាឆ្ងាយពីយេីងនៅឡេីយទេ បេីយេីងធ្វេសប្រហែសតែបន្តិចនោះ នឹងមានហានិភ័យខ្ពស់ណាស់ ក្នុងការចម្លងវីរុសនេះ ពីបុគ្គលម្នាក់ទៅបុគ្គលម្នាក់ទៀត ដែលនឹងអាចធ្លាក់ចូលទៅសភាពធ្ងន់ធ្ងរជាមិនខាន ដូច្នេះសូមឲ្យអាជ្ញាធរគ្រប់មូលដ្ឋាន នៅតែបន្តធ្វើការផ្សព្វផ្សាយសារអប់រំអំពីវិធានការបង្ការទប់ស្កាត់ការឆ្លងរីករាលដាលនៃជំងឺកូវីដ១៩នេះជាបន្តទៀត ដេីម្បីឲ្យបងប្អូនប្រជាពលរដ្ឋយើង បន្តអនុវត្តគម្លាតសុវត្ថិភាពបុគ្គល និងគម្លាតសុវត្ថិភាពសង្គម និងប្រេីប្រាស់ម៉ាស់ ព្រមទាំងធ្វើអនាម័យជាប្រចាំ ឲ្យបានគ្រប់ៗគ្នាផងដែរ។
ក្នុងកិច្ចប្រជុំនេះដែរ ឯកឧត្តម ខ្លូត ផន ប្រធានក្រុមប្រឹក្សាខេត្តកំពង់ចាម បានដឹកនាំការអនុម័តលើរបៀបវារៈចំនួន៤ ក្នុងនោះមាន៖
១-ពិនិត្យ និងអនុម័តសេចក្តីព្រាងកំណត់ហេតុនៃកិច្ចប្រជុំសាមញ្ញលើកទី១១ របស់ក្រុមប្រឹក្សាខេត្តកំពង់ចាម អាណត្តិទី៣។
២-ពិនិត្យ ពិភាក្សា និងអនុម័តសេចក្តីព្រាងរបាយការណ៍ស្តីការអនុវត្តន៍ការងារប្រចាំខែមេសា និងលើកទិសដៅប្រចាំខែឧសភា ឆ្នាំ២០២០ របស់រដ្ឋបាលខេត្ត។
៣-ពិនិត្យ ពិភាក្សា និងអនុម័តលើសេចក្តីព្រាងស្តីពីការរៀបចំផែនការក្របខ័ណ្ឌសម្រាប់ឆ្នាំ២០២១ របស់មន្ទីរសុខាភិបាលខេត្តនៃរដ្ឋបាលខេត្តកំពង់ចាម។ និង៤-ពិនិត្យ ពិភាក្សា និងអនុម័តលើសេចក្តីព្រាងផែនការលទ្ធកម្មកែតម្រូវប្រចាំឆ្នាំ២០២០ របស់រដ្ឋបាលខេត្តកំពង់ចាម ផងដែរ ៕
