កាកបាទក្រហមកម្ពុជាខេត្តមណ្ឌលគិរី នាំយកអំណោយមនុស្សធម៌ ផ្តល់ជូនពលរដ្ឋរងគ្រោះដោយភ្លើងឆេះផ្ទះចំនួន ២គ្រួសារ នៅស្រុកកោះញែក

លោក សាយ ម៉េងគីម បានចូលរួមសោកស្តាយចំពោះឧបទ្ទវហេតុភ្លើងឆេះផ្ទះរបស់បងប្អូនប្រជាពលរដ្ឋ បណ្ដាលឱ្យមានការខូចខាតសម្ភារៈប្រើប្រាស់ក្នុងផ្ទះសំបែង និងទ្រព្យសម្បត្តិជាច្រើនផងដែរ។ នាឱកាសនោះ លោក ក៏បានពាំនាំនូវការផ្តាំផ្ញើសួរសុខទុក្ខពីសំណាក់ ឯកឧត្តម ស្វាយ សំអ៊ាង ប្រធានគណៈកម្មាធិការសាខាកាកបាទក្រហមកម្ពជាខេត្ត ជាពិសេស សម្តេចកិតិ្តព្រឹទ្ធបណ្ឌិត ប៊ុនរ៉ានី ហ៊ុនសែន ជាប្រធានកាកបាទក្រហមកម្ពុជា ដែលជានិច្ចកាល សម្តេច តែងតែយកចិត្តទុកដាក់ គិតគូរពីសុខុមាលភាពជូនប្រជាពលរដ្ឋទូទៅ ដោយមិនប្រកាន់និន្នាការនយោបាយអ្វីឡើយ។ ជាក់ស្តែង ប្រជាពលរដ្ឋរងគ្រោះ ចំនួន២ គ្រួសារនាពេលនេះ ទទួលបានអំណោយមនុស្សធម៌មួយចំនួនពីសាខាកាកបាទក្រហមកម្ពុជាខេត្ត ក៏ដូចជាសប្បុរសជននានា ដើម្បីជួយដោះស្រាយនូវការខ្វះខាតបានមួយរយៈពេលខ្លី។

លោក បានជំរុញដល់អាជ្ញាធរ និងសមត្ថកិច្ចមូលដ្ឋាន ត្រូវជួយសម្រួលធ្វើអត្តសញ្ញាណប័ណ្ណ សៀវភៅគ្រួសារ ឫសៀវភៅស្នាក់នៅ និងឯកសារផ្សេងៗទៀត ដែលត្រូវភ្លើងឆេះ ធ្វើជូនគ្រួសាររងគ្រោះឱ្យបានឆាប់រហ័ស ក្នុងការងាយស្រួលដោះស្រាយ និងប្រកបមុខរបរផ្សេងៗ ដើម្បីធ្វើយ៉ាងណាស្តារនូវជីវភាពគ្រួសារឡើងវិញ ជាពិសេស ត្រូវចូលរួមសំអាតអនាម័យបរិស្ថានជុំវិញផ្ទះឱ្យបានស្អាត តាមរយៈការរស់នៅស្អាត ហូបស្អាត និងផឹកស្អាតផងដែរ។

នាឱកាសនោះ លោក សាយ ម៉េងគីម បាននាំយកអំណោយមនុស្សធម៌ ចែកជូនដល់ប្រជាពលរដ្ឋរងគ្រោះចំនួន ២គ្រួសារ រួមមាន៖ ក្នុង ១គ្រួសារ ទទួលបានអង្ករ ២៥គីឡូក្រាម ទឹកត្រី ទឹកស៊ីអ៊ីវ មី ត្រីខ កន្ទេល តង់ ឃីត ២កញ្ចប់ និងថវិកា ១លានរៀល ដោយឡែក អនុសាខាកាកបាទក្រហមកម្ពុជាស្រុកកោះញែក និងសប្បុរសជន បានឧបត្ថម្ភផ្តល់ជូនគ្រួសាររងគ្រោះទាំង ២គ្រួសារ ក្នុង១គ្រួសារ ទទួលថវិកា ២៤ម៉ឺនរៀលផងដែរ៕