កំពង់ចាម៖ឯកឧត្តម អ៊ុន ចាន់ដា អភិបាលនៃគណៈអភិបាលខេត្តកំពង់ចាម រួមដំណើរជាមួយអភិបាលរងខេត្ត និងសមាជិកក្រុមប្រឹក្សាខេត្ត នាល្ងាចថ្ងៃទី៤ ខែមិថុនា ឆ្នាំ២០២០នេះ បានអញ្ជើញចុះសាកសួរសុខទុក ឯកឧត្តម ទុំ លឹម យុន សមាជិកក្រុមប្រឹក្សាខេត្ត ដែលបានចូលសម្រាកព្យាបាលជំងឺដោយវះកាត់ពោះវៀនដោះខ្នែង និងបងប្អូនប្រជាពលរដ្ឋដែលបានសម្រាកព្យាបាលជំងឺ នៅមន្ទីរពេទ្យខេត្តកំពង់ចាម ។
ក្នុងឱកាសការចុះសាកសួរសុខទុក្ខនេះដែរ ឯកឧត្ដម អ៊ុន ចាន់ដា អភិបាលខេត្តកំពង់ចាម ក៏បានសម្ដែងនូវមនោសញ្ចេតនា និងទឹកចិត្តព្រួយបារម្ភ ព្រមទាំងបានលើកទឹកចិត្ត ដល់គ្រួសារ និងអ្នកជំងឺ ដើម្បីឲ្យបានឆាប់ជាសះស្បើយពីជំងឺ គឺត្រូវអនុវត្តតាមការណែនាំរបស់ក្រុមគ្រូពេទ្យ ដែលបានពិនិត្យ វិភាគ ព្យាបាលជម្ងឺ ហើយត្រូវពិសារឱសថ ឲ្យបានទៀងទាត់ តាមពេលវេលាដែលបានកំណត់ ព្រមទាំងបរិភោគម្ហូបអាហារប៉ូវកម្លាំង រួមផ្សំនឹងការសម្រាកឲ្យបានគ្រប់គ្រាន់ ទើបទទួលបានសុខភាពល្អឡើងវិញ ។
ក្នុងឱកាសនោះដែរ ឯកឧត្តមអភិបាលរងខេត្ត ក៏បានឧបត្ថម្ភនូវថវិកា ចំនួន១លានរៀល ជូនដល់ឯកឧត្តម ទុំ លឹមយុន ដេីម្បីជួយសម្រាលបន្ទុកក្នុងការព្យាបាល។
ជាមួយគ្នានោះ ឯកឧត្តមអភិបាលខេត្ត ក៏បានអញ្ជើញសាកសួរសុខទុក ដល់បងប្អូនប្រជាពលរដ្ឋ ដែលបាននាំសមាជិកក្រុមគ្រួសារមកសម្រាកព្យាបាលជំងឺនៅមន្ទីរពេទ្យខេត្តកំពង់ចាម ព្រមទាំងឧបត្ថម្ភថវិកាក្នុងម្នាក់ៗ ចំនួន៥ម៉ឺនរៀល ផងដែរ ៕
