(ប៉ៃលិន)៖ ឯកឧត្តម ផាន់ ចាន់ធុល អភិបាលខេត្តប៉ៃលិន អមដំណើរដោយថ្នាក់ដឹកនាំ មន្ត្រីរាជការ និងអាជ្ញាធរមូលដ្ឋាន ព្រមទាំងក្រុមការងារ នៅថ្ងៃទី៧ ខែកញ្ញា ឆ្នាំ២០២០ បានអញ្ជើញបើកការដ្ឋាន ស្ថាបនាផ្លូវ ក្រាលកៅស៊ូប្រភេទ DBST ១ខ្សែ ភ្ជាប់ពីផ្លូវជាតិលេខ៥៩ ត្រង់រង្វង់មូលសាលាក្រៅ ឆ្ពោះទៅផ្លូវជាតិលេខ៥៧ ត្រង់ឃុំស្ទឹងកាច់ ស្រុកសាលាក្រៅ ខេត្តប៉ៃលិន ដែលឆ្លងកាត់ចំនួន ០៤ភូមិ ដើម្បីសម្រួលដល់ការធ្វើចរាចរណ៍ជូនបងប្អូនប្រជាពលរដ្ឋ និងសិស្សានុសិស្សមក សាលារៀន។
ឯកឧត្តម ផាន់ ចាន់ធុល បានលើកឡើងថា ក្រោមមាគ៌ាដឹកនាំរបស់សម្តេចនាយករដ្ឋមន្ត្រី ហ៊ុន សែន និងក្រោមគោលនយោបាយឈ្នះឈ្នះ បានធ្វើឱ្យប្រទេសជាតិ ទទួលបាននូវសុខសន្តិភាព ពេញផ្ទៃប្រទេស ជាពិសេសបានធ្វើឱ្យខេត្តប៉ៃលិន ដែលជាខេត្តជាយដែន និងធ្លាប់ជាសមរភូមិយ៉ាងក្តៅគគុក មានការអភិវឌ្ឍ និងរីកចម្រើនលើគ្រប់វិស័យ ហើយជីវភាពរបស់ ប្រជាពលរដ្ឋកាន់តែធូរធាឡើងពីមួយថ្ងៃទៅមួយថ្ងៃ។
ឯកឧត្តមអភិបាលខេត្ត បានបញ្ជាក់ថា ផ្លូវនេះពិតជាមានសារៈសំខាន់ណាស់ទាំងផ្នែកសេដ្ឋកិច្ច ផ្នែកទេសចរណ៍ និងបម្រើដល់ជីវភាពរស់នៅប្រចាំថ្ងៃរបស់ប្រជាពលរដ្ឋ ហើយបន្ទាប់ពីស្ថាបនារួចរាល់ គឺផ្លូវនេះនឹងអាច សម្រួលដល់ការធ្វើដំណើរ និងការដឹកជញ្ជូនកសិផលនានាទៅកាន់ទីផ្សារ ឱ្យមានភាពកាន់តែងាយស្រួល ជាពិសេសស ម្រួលដល់ សិស្សានុសិស្សបានធ្វើដំណើរទៅសិក្សា រៀនសូត្រ បានទាន់ពេលវេលា។
នៅក្នុងឱកាសនោះផងដែរឯកឧត្តម ផាន់ ចាន់ធុល បានសំណូមពរដល់បងប្អូន ប្រជាពលរដ្ឋទាំងអស់ ត្រូវរួមគ្នាជួយថែរក្សាទ្រព្យសម្បត្តិសាធារណៈរបស់រដ្ឋ ពិសេសផ្លូវថ្នល់នេះតែម្តង ព្រោះថាការកសាង និងជួសជុលហេដ្ឋារចនាសម្ព័ន្ធ គឺត្រូវចំណាយថវិកាជាតិយ៉ាងច្រើនសន្ធឹកសន្ធាប់ ហើយប្រជាពលរដ្ឋដែលនៅរស់នៅសងខាងផ្លូវនេះ មេត្តាយោគយល់ និងអធ្យាស្រ័យ ព្រមទាំងចូលរួម សហការជាមួយក្រុមការងារបច្ចេកទេស ដើម្បីឱ្យសមិទ្ធផលថ្មីនេះ សម្រេចបានទៅតាមការគ្រោងទុក និងឆាប់បានប្រើប្រាស់ទាំងអស់គ្នា។
បើតាមការបញ្ជាក់ពីលោក អ៊ាត សារ៉ាត់ ប្រធានមន្ទីរសាធារណការ និងដឹកជញ្ជូនខេត្តប៉ៃលិន ផ្លូវលេខ១៥.៩៣ ដែលបានបើកការដ្ឋានស្ថាបនា នាពេលនេះ មានប្រវែង ៦.៨៤ គីឡូម៉ែត្រ ទទឹង៧ ម៉ែត្រ ក្រាលកៅស៊ូប្រភេទ DBST ក្នុងនោះសាងសង់ លូប្រអប់កាត់ទទឹងថ្នល់មុខ មួយប្រវែង ១២ម៉ែត្រ ចំនួន០១កន្លែង សាងសង់លូមូលកាត់ទទឹងថ្នល់មុខ២ អង្កត់ផ្ទិត ១ម ប្រវែង ១២ម ចំនួន ០៤ កន្លែង សាងសង់ លូ មូលកាត់ទទឹងថ្នល់មុខ១ អង្កត់ផ្ចិត ១ម ប្រវែង ១២ម ចំនួន ០១ កន្លែង សាងសង់ប្រឡាយបេតុង រាងចតុកោណព្នាយ ប្រវែង ១៦៣ម សាងសង់លូមូលរំដោះទឹកមុខ២ អង្កត់ផ្ចិត ១ម ប្រវែង ៥០ម សាងសង់លូមូលរំដោះទឹកមុខមួយ អង្កត់ផ្ចិត ១ម ប្រវែង ៤៣ម និងសាងសង់អណ្តូងលូ ចំនួន ០៤ កន្លែង៕
