ភ្នំពេញ៖ ក្រសួងអប់រំ យុវជន និងកីឡា បានរៀបចំវគ្គបណ្ដុះបណ្ដាលស្ដីពី ការអប់រំបង្ការ និងទប់ស្កាត់ការរីករាលដាលជំងឺកូវីដ-១៩ ពេលដំណើរការសាលារៀនឡើងវិញជូនចំពោះនាយកសាលា និងមន្រ្តីទទួលបន្ទុកសុខភាពសិក្សាដែលមកពីរាជធានី ខេត្ត ទាំង២៥ និងមកពីការិយាល័យខណ្ឌ ស្រុក ដែលទទួលការគាំទ្រពីសំណាក់អង្គការ សុខភាពពិភពលោក ដើម្បីធ្វើបច្ចុប្បន្នភាព ស្ថានភាពនៃជំងឺកូវីដ-១៩ ថ្នាក់ពិភពលោក ថ្នាក់តំបន់ និងផ្ដល់ចំណេះដឹងថ្មីៗ នៃជំងឺកូវីដ-១៩ និងវិធីបង្ការជាសកលរបស់អង្គការសុខភាពពិភពលោក ព្រមទាំងការបង្ការ និងទប់ស្កាត់កូវីដ-១៩ និងការអនុវត្តគោលការណ៍ប្រតិបត្តិស្តង់ដា (SOP) ក្នុងបរិបទកូវីដ-១៩ នៅពេលដំណើរការគ្រឹះស្ថានសិក្សាឡើងវិញ។
វគ្គបណ្ដុះបណ្ដាលនេះត្រូវបានរៀបចំឡើងក្រោមអធិបតីភាពលោកជំទាវ គឹម សេដ្ឋានី រដ្ឋលេខាធិការក្រសួងអប់រំ យុវជន និងកីឡា។ ក្នុងឱកាសនេះលោកជំទាវបានមានប្រសាសន៍ថ្លែងអំណរគុណដល់អង្គការសុខភាពពិភពលោក ព្រមទាំងគ្រប់អង្គភាពពាក់ព័ន្ធ និងលោកគ្រូ អ្នកគ្រូ នៅទូទាំងប្រទេស ដែលបានសហការគាំទ្រផ្នែកសុខភាពសិក្សា និងដោះស្រាយបញ្ហាការសិក្សាពីចម្ងាយក្នុងដំណាក់កាលទប់ស្កាត់ការរាលដាលនៃជំងឺកូវីដ-១៩ ជូនដល់សិស្សមិនឲ្យជួបវិបត្តិ។
លោកជំទាវបានមានប្រសាសន៍បន្ថែមថា ក្រសួងបានចងក្រង និងផ្សព្វផ្សាយរួចហើយពីគោលនយោបាយលើកកម្ពស់សុខភាពសិក្សាដែលទាមទារឲ្យមានការចូលរួមតាំងពីឆ្នាំ២០០៦ ហើយការអប់រំសុខភាពសិក្សានេះ ត្រូវបានចាត់បញ្ចូលជាកម្មវិធីសិក្សាកាតព្វកិច្ចនៅតាមគ្រឹះស្ថានសិក្សាដែលត្រូវបង្រៀន១ម៉ោង ក្នុង១សប្ដាហ៍៕
២៨ កញ្ញា ២០២០ | នៅសាលប្រជុំធំអគាររដ្ឋបាលចៅពញាហុក