សៀមរាប អាជ្ញាធរជាតិអប្សរា សហការជាមួយវិទ្យាស្ថានជាតិស្រាវជ្រាវមរតកវប្បធម៌ នៃទីក្រុងតូក្យូ (Tokyo)ប្រទេសជប៉ុន បានធ្វើការជួសជុលខ្លោងទ្វារខាងកើតរបស់ប្រាសាទតានៃជិតរួចរាល់ជាស្ថាពរហើយ។
លោក ស៊ា សុភារុន បុរាណវិទូនៃនាយកដ្ឋានអភិរក្សប្រាសាទក្នុងឧទ្យានអង្គរ និងបុរា ណវិទ្យាបង្ការ និងជាប្រធានការដ្ឋានជួសជុល បានឱ្យដឹងកាលពីថ្ងៃ១កើត ខែបុស្ស ឆ្នាំជូត ទោស័ក ព.ស. ២៥៦៤ ត្រូវនឹងថ្ងៃអង្គារ ទី១៥ ខែធ្នូ ឆ្នាំ២០២០ថា ការជួសជុលខ្លោងទ្វារខាងកើតប្រាសាទតានៃ ដែលចាប់ផ្តើមតាំងពីឆ្នាំ២០១៩មកម្ល៉េះ ពេលនេះឈានទៅដល់ការគ្រោងនឹងបញ្ចប់នៅត្រឹមចុងឆ្នាំ២០២០នេះ។
លោកបន្តថា ដើមឡើយបញ្ហាប្រឈមខ្លាំងរបស់ខ្លោងទ្វារខាងកើតប្រាសាទតានៃ គឺរចនាសម្ព័ន្ធទាំងមូលរបស់ខ្លោងទ្វារតែម្តង ដោយមូលហេតុឬស និងដើមឈើធ្វើឱ្យគ្រឹះរំកិលចេញពីទីតាំងដើមបណ្តាលឱ្យថ្មជញ្ជាំងហែកចេញពីគ្នានឹងអាចបាក់រលំ។ រីឯដំបូលថ្មបានជ្រុះធ្លាក់ស្ទើរទាំងស្រុង។ រហូតមកដល់ពេលនេះ ខ្លោងទ្វារខាងកើតនៃប្រាសាទតានៃត្រូវបានជួសជុលស្ទើរតែរួចរាល់ និងថ្មដំបូលត្រូវបានរៀបចំដំឡើងឡើងវិញតាមរូបរាងដើមទាំងស្រុង ៕
