សម្តេចវិបុលសេនាភក្តី សាយ ឈុំ ប្រធានព្រឹទ្ធសភា នៃព្រះរាជាណាចក្រកម្ពុជា បានស្នើដល់ឯកឧត្តមឯកអគ្គរដ្ឋទូតអាម៉េរិក ប្រចាំកម្ពុជា ជួយជម្រុញបន្ថែមទៀត នូវទំនាក់ទំនងទ្វេភាគី រវាងកម្ពុជា និងសហរដ្ឋអាម៉េរិក ក៏ដូចជាជំនួយកម្ពុជាលើវិស័យកសិកម្ម សុខាភិបាល អប់រំ បរិស្ថាន និងផ្នែកយោធា ។
ការស្នើនេះ ធ្វើឡើងនៅក្នុងឱកាសដែល សម្តេចវិបុលសេនាភក្តី សាយ ឈុំ អនុញ្ញាតឱ្យ ឯកឧត្តម វីលៀម អេហេត ឯកអគ្គរដ្ឋទូតវិសាមញ្ញ និងពេញសមត្ថភាពរបស់សហរដ្ឋអាម៉េរិក ប្រចាំកម្ពុជា ចូលជួបសម្តែងការគួរសម និងធ្វើសវនាការ កាលពីព្រឹកថ្ងៃទី០៣ ខែកុម្ភៈ នៅវិមានព្រឹទ្ធសភា ។
ឯកឧត្តម ម៉ម ប៊ុននាង មន្ត្រីនាំពាក្យព្រឹទ្ធសភា បានឱ្យថា សម្តេចវិបុលសេនាភក្តី សាយ ឈុំ បានសម្តែងនូវការស្វាគមន៍យ៉ាងកក់ក្តៅបំផុតចំពោះ ឯកឧត្តម វីលៀម អេហេត ដែលបានឆ្លៀតឱកាសមកសម្តែងការគួរសម និងសវនាការនាពេលនេះ ។ តាមរយៈឯកឧត្តមឯកអគ្គរដ្ឋទូត សម្តេចប្រធានព្រឹទ្ធសភាក៏បានអរគុណផងដែរ ចំពោះវត្តមានរបស់ ឯកឧត្តមរដ្ឋមន្ត្រីក្រសួងការបរទេសអាម៉េរិក ដែលបានមកធ្វើទស្សនកិច្ចនៅកម្ពុជា ក្នុងពេលកន្លងមកនេះ ។ សម្តេចប្រធានព្រឹទ្ធសភា ក៏បានបានស្នើដល់ ឯកឧត្តមឯកអគ្គរដ្ឋទូតអាម៉េរិក ជួយជម្រុញបន្ថែមទៀត នូវទំនាក់ទំនងទ្វេភាគី រវាងកម្ពុជា និងសហរដ្ឋអាម៉េរិក ក៏ដូចជាជំនួយថែមទៀតមកកម្ពុជា សម្រាប់វិស័យកសិកម្ម សុខាភិបាល អប់រំ បរិស្ថាន ហើយនិងផ្នែកយោធា ។
ជាការឆ្លើយតប ឯកឧត្តម វីលៀម អេហេត បានជម្រាបជូនសម្តេចប្រធានព្រឹទ្ធសភា អំពីលទ្ធផលជាវិជ្ជមាន រវាងជំនួបរបស់រដ្ឋមន្ត្រីការបរទេសសហរដ្ឋអាម៉េរិក ជាមួយរដ្ឋមន្ត្រីក្រសួងការបរទេសកម្ពុជា ក៏ដូចជាជំនួបរវាងសម្តេចនាយករដ្ឋមន្ត្រី ប្រមុខរាជរដ្ឋាភិបាលកម្ពុជា ក្នុងឱកាសមកបំពេញទស្សនកិច្ចនៅកម្ពុជាមកនេះ បានបង្ហាញនូវទំនាក់ទំនងយ៉ាងយកចិត្តទុកដាក់ជាទីបំផុត ។
ឯកឧត្តមឯកអគ្គរដ្ឋទូត បានជម្រាបជូនបន្ថែមថា ក្នុងដំណើរទស្សនកិច្ចរបស់រដ្ឋមន្ត្រីការបរទេសសហរដ្ឋអាម៉េរិកនៅកម្ពុជានេះដែរ លោកបានចុះទៅតាមបណ្តាខេត្តមួយចំនួន របស់កម្ពុជា ជាមួយនឹងការកោតសរសើរ និងបានបញ្ជាក់យ៉ាងច្បាស់អំពីលទ្ធផល នៃការអភិវឌ្ឍប្រទេសជាតិរបស់កម្ពុជា ពិតជាមានការរីកចម្រើន មិនត្រឹមតែនៅទីក្រុងទេ នៅតាមជនបទ ខេត្តក៏មានការរីកចម្រើនគួរឱ្យកត់សម្គាល់ ។ លោកសូមអបអរសាទរ និងសប្បាយរីករាយណាស់ ចំពោះការប្រឹងប្រែងរបស់រាជរដ្ឋាភិបាល និងប្រជាជនកម្ពុជា ។
ឯកឧត្តម វីលៀម អេហេត ក៏បានជម្រាបជូនសម្តេចវិបុលសេនាភក្តីដែរថា ក្នុងជំនួបទ្វេភាគីជាមួយសម្តេចនាយករដ្ឋមន្ត្រីកម្ពុជា សម្តេចតេជោ ហ៊ុន សែន បានសន្យាថា នឹងអញ្ជើញទៅចូលរួមកិច្ចប្រជុំអាស៊ាន អាម៉េរិក នៅទីក្រុងកាលីហ្វ័រញ៉ា សហរដ្ឋអាម៉េរិក ដែលក្នុងដំណើរទស្សនកិច្ចនេះ នឹងជួបធ្វើការរវាងក្រសួងហិរញ្ញវត្ថុកម្ពុជា និងក្រសួងហិរញ្ញវត្ថុសហរដ្ឋអាម៉េរិក ពេលនោះហើយ កម្ពុជានឹងបានធ្វើការផ្សព្វផ្សាយអំពីការវិនិយោគអំពីសក្តានុពលរបស់កម្ពុជា ដែលមានជូនដល់ធុរកិច្ចអាម៉េរិកផងដែរ ។ ឯកឧត្តមឯកអគ្គរដ្ឋទូតសង្ឃឹមថា កម្ពុជានឹងទទួលលទ្ធផលជាទីពេញចិត្តជាក់ជាមិនខាន ។
ជាការឆ្លើយតបចំពោះសំណូមពររបស់ សម្តេចប្រធានព្រឹទ្ធសភា ឯកឧត្តម វីលៀម អេហេត បានស្វាគមន៍ និងបានសន្យាថា នឹងជួយអំពីបញ្ហានេះ ដោយឡែកផ្នែកយោធានៅខែក្រោយ នេះនឹងមានការធ្វើសមយុទ្ធយោធាកម្ពុជា-សហរដ្ឋអាម៉េរិកមួយនៅខេត្តកំពង់ស្ពឺ ដែលពេលនោះនឹងមានជំនួយផ្នែកយោធា របស់សហរដ្ឋអាម៉េរិកសម្រាប់កម្ពុជាផងដែរ ៕