សាលារាជធានីភ្នំពេញ បានជូនដំណឹងមិនឲ្យមានការដុតផាវ… កាំជ្រូច ឬបង្កសំឡេងផ្ទុះគ្រប់ប្រភេទ នៅក្នុងឱកាសបុណ្យចូលឆ្នាំប្រពៃណីចិន និងរៀតណាម ខាងមុខនេះឡើយ ។ ពិធីបុណ្យចូលឆ្នាំប្រពៃណីចិន និងរៀតណាម នឹងប្រព្រឹត្តទៅចាប់ពីថ្ងៃទី០៧ ដល់ថ្ងៃទី១០ ខែកុម្ភ: ឆ្នាំ ២០១៦ ។
ក្នុងរយៈពេល ៤ថ្ងៃនេះ គឺមិនឲ្យលេងល្បែងស៊ីសងគ្រប់ប្រភេទ និងហាមរាល់ការហែរក្បូនផ្សេងៗ ទាំងបែបសាសនា និងប្រពៃណីផងដែរ ។ និងបានដាស់តឿនការប្រុងប្រយ័ត្ន ចំពោះការដុតក្រដាសសែនដោយត្រូវប្រើធុងដែក ឬឆ្នាំងដី… ហើយការដុតមិនត្រូវធ្វើលើចិញ្ចើមផ្លូវឬលើទ្រូងផ្លូវនោះទេ ។ ព្រមទាំងបានហាមការនាំចូលផាវ,… កាំជ្រូច,… ជាតិផ្ទុះគ្រប់ប្រភេទ ចេញចូលក្នុងរាជធានី និងហាមការដាក់តាំងលក់វត្ថុទាំងនោះ ក្នុងរាជធានីភ្នំពេញថែមទៀត ។
ចំពោះជនណាដែលបំពានលើសេចក្តីណែនាំទាំងនេះ ឬប្រព្រឹត្តល្មើសបង្កចលាចលក្នុងសង្គម ធ្វើឱ្យបាត់បង់សណ្តាប់ធ្នាប់ សន្តិសុខ សុវត្ថិភាព និងរបៀបរៀបរយសាធារណៈ នឹងត្រូវទទួលទោសតាមច្បាប់ ។