សម្តេចតេជោនាយករដ្ឋមន្រ្តី ហ៊ុន សែន បានមានប្រសាសន៍អំពាវនាវដល់ប្រជាពលរដ្ឋជា ពិសេសយុវជនចូលរួមបរិច្ចាកឈាម ដើម្បីជួយសង្គ្រោះជីវិតមនុស្ស ។ សម្តេចបញ្ជាក់ថា ការបរិច្ចាកឈាម បានជួយសង្គ្រោះជីវិតអ្នកជំងឺដែលត្រូវការឈាមជាចាំបាច់ ជាពិសេសក្មួយៗយុវជន យុវនារី ជាទីស្រឡាញ់ សូមចូលរួមបរិច្ចាគឈាមជួយសង្រ្គោះជីវិតអ្នកជំងឺ ដែលកំពុងត្រូវការឈាមចាំបាច់បំផុតនៅក្នុងប្រទេស ។
យើងពិតជាសប្បាយចិត្ត នៅពេលដែលយើងអាចជួយជីវិតមនុស្សបាន តាមរយៈការផ្តល់ឈាម ។ សម្តេចមានជំនឿថា ពលរដ្ឋគ្រប់ៗរូបអាចធ្វើបាន ជាពិសេសយុវជន ដែលគ្រាន់តែចំណាយពេល ២៥ នាទីតែប៉ុណ្ណោះ ។ ការបរិច្ចាគឈាមគឺមិនប៉ះពាល់ដល់សុខភាពឡើយ ។ ចំពោះរូបសម្តេចវិញ គឺសម្តេចនឹងឆ្លៀតយកពេលពីការងារទៅបរិច្ចាគឈាម ជួយពលរដ្ឋនៅថ្ងៃណាមួយខាងមុខនេះ ប្រសិនបើគ្រូពេទ្យដែលព្យាបាលអនុញ្ញាត ។
រាជធានីភ្នំពេញ ដែលមានការរងគ្រោះថ្នាក់ចរាចរណ៍ញឹកញាប់ សេចក្តីត្រូវការឈាមដើម្បីជួយជីវិតអ្នករងគ្រោះ ត្រូវបានក្រុមយុវជន និងតាមអង្គភាពខ្លះរបស់ក្រសួងនានា ត្រូវគេឃើញបានធ្វើជាបន្តបន្ទាប់ ។ យោងតាមអ្នកឯកទេសនៅក្នុងរាជធានីភ្នំពេញ យ៉ាងហោចណាស់ឈាមប្រមាណពី ៨០ ទៅ ១០០ប្លោក ត្រូវការរៀងរាល់ថ្ងៃតាមមន្ទីរពេទ្យ និងដោយឡែកនៅទូទាំងប្រទេស សេចក្តីត្រូវការឈាមយ៉ាងហោចក៏ ១៥០ប្លោក ផងដែរ ។
