ប្រសិនជាពុំមានអ្វីប្រែប្រួលទេ អាជ្ញាធរជាតិអប្សរាត្រៀមរៀបចំព្រឹត្តិការណ៍រំលឹកគុណអង្គរ រយៈពេលបីថ្ងៃក្នុងខែធ្នូនេះ។ ប្រភពអាជ្ញាធរជាតិអប្សរាដែលបានផ្សព្វផ្សាយនៅព្រឹកថ្ងៃទី១០ខែធ្នូនេះបានស្រង់សំដីលោក ឡុង កុសល អគ្គនាយករងអាជ្ញាធរជាតិអប្សរាមកបញ្ជាក់ថា អាជ្ញាធរជាតិអប្សរានឹងរៀបចំពិធីរំលឹកគុណអង្គរ ចំនួនបីថ្ងៃ ចាប់ពីថ្ងៃទី១៤ដល់ទី១៦ ខែធ្នូ ឆ្នាំ២០២១ខាងមុខ ដែលមានកម្មវិធីសាសនា ស្ដង់ពិព័រណ៍ និងការសម្ដែងសិល្បៈបុរាណនៅពេលរាត្រី។ កម្មវិធីនេះ នឹងរៀបចំនៅមុខ ប្រាសាទអង្គរវត្ត បរិវេណខាងមុខប្រាសាទភ្នំបាខែង និងព្រះលានជល់ដំរីដោយរៀបចំឱ្យមានទស្សនីយភាពជាច្រើនដូចជា កម្មវិធីបែបសាសនាសំខាន់ៗ ការតាំងពិព័រណ៍ បង្ហាញសមិទ្ធផលការងាររយ:ពេល២៩ឆ្នាំកន្លងមករបស់អាជ្ញាធរជាតិអប្សរា និងស្នាដៃសិល្បៈផ្សេងៗដែលជាទំនៀមទម្លាប់ប្រពៃណី កម្មវីធីសម្តែងសិល្បៈ ដូចជា ការសម្តែងល្ខោនស្បែកធំ ល្ខោនបាសាក់ដែលសុទ្ធតែមានសារសំខាន់សម្រាប់បង្ហាញជូនសាធារណជនទស្សនា និងកម្មវិធីរាប់បាតព្រះសង្ឃផងដែរ។
ប្រភពដដែលបន្តថាមុនការប្រារព្វពិធីនេះ ក៏នឹងមានការប្រារព្វពិធីសាសនា និងការសម្តែងសិល្បៈ ជាពិសេសការសម្តែងល្ខោនបាសាក់ ឧបត្ថមគាំទ្រដោយវិស័យឯកជនផងដែរ នៅថ្ងៃទី១២ និងថ្ងៃទី១៣ ខែធ្នូនៅបរិវេណប្រាសាទភ្នំបាខែង និងទីលានជល់ដំរី ក្រុងអង្គរធំ។
អាជ្ញាធរអប្សរាបានបញ្ជាក់ថា ពិធីរំលឹកគុណអង្គរ គ្រោងនឹងរៀបចំឡើងជារៀងរាល់ឆ្នាំ នាឆ្នាំបន្តបន្ទាប់ដោយយកឆ្នាំ២០២១នេះ គឺជាឆ្នាំសាកល្បង ដែលព្រឹត្តិការណ៍នេះ រៀបចំឡើងក្នុងគោលបំណង ដើម្បីរំលឹកគុណអង្គព្រះមហាក្សត្រគ្រប់ព្រះអង្គ និងបុព្វការីជនដែលលោកបានកសាង និងថែរក្សាប្រាសាទទាំងអស់នៅក្នុងរមណីយដ្ឋានអង្គរ ដោយបានផ្តល់អត្ថប្រយោជន៍ជាច្រើនដល់ជាតិមាតុភូមិតាំងពីដើមរហូតដល់សព្វថ្ងៃ ការបង្ហាញពីពិធីបែបសាសនាផ្សេងៗ និងការបង្ហាញអំពីសមិទ្ធផលការងារជាច្រើន ដែលអាជ្ញាធរជាតិអប្សរាបានខិតខំធ្វើនាពេលកន្លងមកក្នុងការអភិវឌ្ឍន៍អង្គរសម្រាប់ជនរួមជាតិទាំងមូល៕
